بعد انتقاد تصريحه عن صعوبة التمثيل.. أحمد زاهر لـ«بصراحة»: لم أقصد التقليل من المهن الأخرى والزبال على راسي

رد الفنان أحمد زاهر على الانتقادات التي وجهت له بعد تصريحاته الاخيرة عن صعوبة مهنة التمثيل، مشيرًا إلى أنه كل من ينتقده يريد أن يُحدث“لغط”، وكان من الواجب مراجعة حديثه قبل الانتقاد.

وقال أحمد زاهر في تصريح خاص لـ”بصراحة”: اللي بيتكلم عايز يعمل لغط وخلاص، أنا قولت مفيش دكتور ولا محامي ولا مهندس يقدر يقف على رجله 36 ساعة، أنا محقرتش من المهن التانية.

وواصل: أنا أبويا وأمي دكاترة،بس مفيش دكتور يقدر يقف يعمل عملية 36 ساعة، دي في روح مريض في إيده، المواعيد العامة بيقعدوا 12 أو 8 ساعات، أنا بتكلم بس إني في مهنتنا بيبقى فيه صعوبة شديدة، إحنا ساعات بنضر للتصوير 24 ساعة والـ 26 ساعة وفي أوردر في بيروت صورت فيها 36 ساعة، فهتولي مهنة تانية، تقدر الشخص اللي فيها يقف الوقت ده متواصل من غير نوم، ده اللي أنا قولته.

أحمد زاهر يرد على انتقادات إهانته للمهن الاخرى

وأضاف: أنا الزبال على راسي والقهوجي على راسي، أي مهنة في الدنيا على راسنا من فوق كلنا، فمفيش داعي للغط، أنا مبحبش التريندات ولا بحب أرغي فيها كتير اللي عايز يظن زي ما يظن هو حر، يعني أنا كلامي كان واضح بكل الأدب والذوق أنا لا حكرت من المهن، ولا قولت أي حاجه، أنا قولت إن مفيش أي مهنة في الدنيا أي شخص فيها يقدر يستحمل، 30 ساعة صاحي بيشتغل ويمارس المهنة دون توقف ولا نوم ولا راحة، فإحنا ساعات بيحصلنا كده، أنا بتكلم على صعوبة أداء المهنة فقط.

وأشار زاهر إلى أن كل مهنة ولها مصاعبها، قائلًا: أنا لا قولت التمثيل أصعب من المحاماة ولا الدكترة، أنا متكلمتش ولا خصيت حد، يعني أنا مقدرش أروح أعمل عملية وأشتغل فيها 36 ساعة أنا اقلق، لأنه مش هيقدر مخه مش هيقدر.

تصريحات أحمد زاهر عن صعوبة التمثيل

جديرًا بالذكر كان قد تعرض الفنان أحمد زاهر للعديد من الانتقادات بعد تصريحاته مساء أمس عبر فضائية الحرة عن صعوبة التمثيل، ولكن حرفها البعض فكان ذلك سبب تعرض لـ الإنتقادات، حيث كان قد قال زاهر:التمثيل إحنا بندمر نفسيتنا بيه،لأن المشاعر ممكن تموت الناس فممكن تموتي من الزعل وبتعيشي نفسك في مشاعر معينة 13 أو 14 مشهد فالجهاز العصبي عندنا بيدمر،أنا صورت 36 ساعة في مسلسل، هاتي لي دكتور أو مهندس او قاضي أو أي مهنىة يقدروا يشتغلوا على رجلهم الساعات أنا آسف ماحدش يقدر لأن شغلتنا أصعب مهنة في التاريخ.