ياسمين عز للستات: أوعي تطلبي من جوزك حاجة في الأزمة الإقتصادية اللي إحنا فيها بدل ما يجيله جلطة

وجهت الإعلامية ياسمين عز، نصيحة للنساء بسبب الأزمة الإقتصادية وارتفاع سعر الدولار الفترة الاخيرة، مشيرة إلى أن قديمًا كانت المرأة تساند زوجها أما الآن لا يوجد ذلك.

وقالت ياسمين عز خلال برنامجها “كلام الناس”:زمان لما الراجل يتزنق مراته كانت بتقلع دهبها وتديهم ليه النهارده.. أما النهارده لو اتزنق مامتها تكلمها تقولها ابعتي لي دهبك اشيله عندي عشان ميطمعش فيه.

وواصلت:مينفعش ده إحنا في أزمة اقتصادية، وفي الوقت ده اوعي تطلبي فيهم حاجة من جوزك بدل ما تجيله جلطة بعد الشر عليه.

ياسمين عز تثير الجدل

من جانبه كانت قد تحدثت الإعلاميةياسمين عز، عن المشكلات الزوجية التي تحدث دائمًا في المنازل بين الأزواج.

وقالت الإعلامية ياسمين عز خلال تقديم برنامجها "كلام الناس" المذاع على شاشة "إم بي سي مصر": " عمرك قولتي لزوجك قصة شعرك حلوة والبرفان بتاعك جميل، حسسيه دائمًا باللمسة بتاعتك، في حياته".

وأضافت عز: "ياشيخة ده انتي بقيتي بتفتحي دولابه عشان تفتشي فيه يا اما تطلعي غيراته تغسليها بس، وكام غيار تعمليهم فوط مطبخ أو تمسحي بيهم البلاط".

وتابعت: "ده انتي بقيتي بتهتمي بغسيل المواعين وتنضيف البيت أكتر من زوجك، والراجل أصلًا أساسه طفل محتاج رعاية واهتمام حسسيه انه زي ولادك، خليكي زي أمه البديلة".

وأشارت: "متخليش زوجك يندم على اللحظة اللي اختارك فيها، العين بتحب زي القلب بالظبط، واهتمي بنفسك على قد ما تقدري واتزوقي بالمتاح واللي موجود عندك".

وأكدت: "مش عارفة ليه أول ما يدخل زوجك تقوليله أقلع الجزمة عشان السجادة، ما هو مشتريها بفلوسه، ووطي صوتك على زوجك عشان ميحسش أنك راجل قدامه".