عفاف رشاد: ابني هو كل حياتي وعمري ما شوفت حد بيحب أمه بطريقة لا توصف غيره

كشفت الفنانة الكبيرة عفاف رشاد تفاصيل علاقتها بنجلها، قائلة «ابني ده هو كل حياتي وروحي ودائما بار بيا وبيحبني حب مشفتهوش قبل كدة بيخاف عليا جدا لدرجة إني لما بنام بيحط إيده قدام وشي عشان يتأكد من نفسي كويس من كتره خوفه إني أموت أو يحصلي حاجة».

وكشفت رشاد، في تصريح خاص لموقع «بصراحة»، أحد المواقف الإنسانية التي لا تنساها لنجلها وتبين مدى خوفه عليها، قائلة «وقت أزمة كورونا كنت بصور مسلسل الاختيار ومن كتر خوفه عليا قالي مش تنزلي وقفل باب أوضتي وشقتي عشان يحميني إن يجيلي المرض بعد ما سمع عن انتشار كورونا وإصابة كتير من زملائي الفنانين.. وكلمت والده المنتج محمد السبكي عشان يحاول يقنعه إني أنزل لإني ملتزمة بشغل وده الاختيار مش أي مسلسل دي حاجة مهمة لبلدنا وتاريخنا.. لكن هما الاتنين اتفقوا مع بعض عشان يحموني من الفيروس اللعين».

وحلت النجمة عفاف رشاد، ضيفة على برنامج «الستات»، الذي تقدمه الإعلاميتان مفيدة شيحة، وسهير جودة، أمس الأربعاء، موجهة نصيحة للفتيات بتجنب وضع الزوجة الثانية، الذي جربته واكتشفت إنه غير مريح، سواء مع زوجها الأول الفنان الراحل سامي العدل، أو الثاني المنتج محمد السبكي، مضيفة «بقالي 30 سنة من عمر ابني مفكرتش أتجوز، لإن ابني لما يبقى شاب ممكن يغير على أمه ويتخانق مع جوزي، وأنا عايزة أربي ابني».