كانوا بيشتكوا لأمي.. ندى موسى : كنت بلعب كورة مع الولاد في الشارع

كشفت الفنانة ندى موسي، خلال حوارها لبرنامج "صاحبة السعادة" على فضائية " دي إم سي" اليوم الاثنين، عن تفاصيل خاصة بطفولتها.

قالت الفنانة ندى موسى: "من صغري كان نفسي أكون ولد وكنت بلعب كورة في الشارع مع الولاد، وكان عندي شورت وتيشيرت الزمالك وكاب عشان شعري طويل، وكنت بنزل الشارع أقول للعيال كابتن أنا معايا كورة معاك أرض".

وأضافت "ندى": "كان عمري 13 سنة وبلعب كورة ومكنش بيبان عليا إني ولد أو بنت، ولما بجيب فيهم أجوان ويكتشفوا في نص اللعب إني بنت كانوا بيشتكوا لأمي".

وتابعت: "كنت بروح نادي الشمس بلعب كورة مع الولاد، وأبويا زملكاوي جدًا وكان جايبلي تيشيرت الزمالك"، موضحًة: "كنت بروح النادي بعمل كل حاجه بلعب مزيكا ولكني من وقت ما كان عمري 7 سنين كنت بتمنى أكون ممثلة".

وأردفت: "أبويا كان بياخدني مسرح وسينما وكان بيتمشى بيا في شارع عماد الدين، وأول مرة روحنا مسرحية، كنا خارجين من السينما وقولتله نفسي أتفرج على المسرح وصادف إن المخرج بتاع المسرحية زميله ودخلت وقفت على المسرح، لأول مرة وأنا عمري 7 سنين، وقولتله أنا هبقى ممثلة وقالي تمام".

وأشارت إلى أنها التحقت بكلية الآداب قسم فلسفة رغم مجموعها الكبير في الثانوية العامة، قائلة: "وأنا عمري 12 سنة أبويا كان عنده مكتبة كبيرة، وكان في كتاب اسمه عودة الروح لتوفيق الحكيم، مكنتش فاهمه حاجة فيه، ولكن كل ما أبويا بيقولي بتعملي ايه بقوله بقرأ وعايزه أذاكر فلسفة عشان أكون ممثلة مختلفة".