كلمة فنان مش سب وقذف.. ابن فكري صادق يدافع عن والده بعد تعرضة للهجوم بسبب سعيد صالح

علق الفنان الشاب مراد فكري، ابنه الفنان فكري صادق، على الهجوم الذي تعرض له بسبب حديثة عن النجم الراحل سعيد صالح، من قبل هند ابنة الفنان سعيد صالح، وكذلك العديد من رواد مواقع التواصل الاجتماعي والسوشيال ميديا.

وكتب مراد فكري، عبر حسابه الرسمي بموقع التواصل الاجتماعي"فيسبوك"، قائلا:"اختى الغالية و الفنانة بنت الاصول هند سعيد صالح، طبعا انتى تعلمى جيدآ عشقى و احترامى و تقديرى للنجم الكبير سعيد صالح و تاريخه منذ صغرى حنى تخرجنا انا و انتى من سنين زملاء و أخوات من المعهد العالى للسينما".

وأضاف:"احنا اكبر من اننا نتكلم على صفحات الفيس بوك يا بنت عمي و عمنا كلنا، و والدى بنفسه قال فى كذا لقاء قبل كدة أن علاقته بالفنان سعيد صالح و عادل إمام كانت علاقة صداقة بعيد عن الفن و اشتغلوا سوا كتير و كل واحد مننا ممكن يقول كلمة عفوية دون قصد غلط، و خصوصآ لما تطلع الكلمة من جيل والدك و والدى لأن دة جيل عظيم و فاهم و واعي و خصوصآ انهم جيل واحد كمان، و الجيل ده معروف بالحب اصلا لحد دلوقتى كمان".

وتابع:"وإن كانت كلمة طلعت غلط او سؤ تفاهم حصل بشكل مفاجئ مش معناه انه غلط لا سمح الله فى الاستاذ سعيد أو بيقول من شأنه رحمة الله عليه".

وطالب مراد :"راعوا يا جماعة كبر السن و العفوية فى الكلام للناس الكبار، الناس دى فنانين كبار و اكبر من اننا نلوم عليهم او نحاسبه بالكلمة، لأن سعيد صالح دة نجم كبير و فكرى صادق فنان كبير برضو، و شكرآ المهتمين و عارفين ان دة مش طبع والدي و ان عمره فى الوسط الفنى ما حد زعل منه".

واستطرد:" الحمد لله احنا ناس فى حالنا مش بتوع مشاكل ولا تريند علشان الناس تعرف مين فكرى صادق او نقيس بالتريند شعبية نجم كبير زي الاستاذ سعيد صالح ؟؟؟ و ربنا يرحم الجميع كل من عليها فان يا جماعة".

وأوضح :"و كلمة( فنان عادى) كلمة لا تقليل شأن ولا سب و قذف لأى حد .. و انا بيربطنى صداقة و زمالة مع اختى المونتيرة المبدعة( هند سعيد صالح) من خلال المعهد العالى للسينما و انا من عشاق النجم سعيد صالح و اشتغلت معاه مسلسل و كان انسان جميل و دمه زى العسسسل و قعدنا اتكلمنا كتير عن ذكرياته هو و ابويا سوا كتير".

وأشار :" ورغم ظروفه المرضية الا انه كان قيمة كبيرة جدا فى المكان و الناس الكبيرة بيبقى معاهم عذرهم احيان كتير.. طالما لا يوجد اهانة او سب لا سمح الله .. يبقا الموضوع سؤ تفاهم و لازم توضيحه بشكل صحيح للناس فى اقرب وقت، و لكل عشاق النجم سعيد صالح و انا اولهم طبعآ ".

واختتم حديثة، قائلا:" لكل عشاق النجم سعيد صالح و انا اولهم طبعآ بس احتراما منكم و رجاء و ليس أمرا من حضراتكم ... بلاش نكبر المواضيع و نشمت فى بعض بالسرعة دى و نعلق لبعض المشانق علشان ممكن الحكاية تتفخم و يبقا موقف و يزعل ناس و اخوات و أصدقاء من بعض عشرتهم و صداقتهم قد عمر جيل كامل زى جيلنا الحالى ... و ستستمر العلاقة الطيبة بين الأبناء لأخر العمر بأذن الله و لن تتغير او تفسد بسبب كلمة او وجهة نظر اتقالت على الهوا بشكل عفوي.. دون مونتاج او تجميل للكلام من فنان له تاريخه و أعماله و عمره يتجاوز السبعين الحمد لله و هو والدى الفنان فكرى صادق والله يا جماعة إللى حصل دة بيحصل فى معظم البرامج المسجلة و بيحصل اكتر من كدة كمان و كلنا عارفين و فاهمين لكن برنامج الاستاذة لميس الحديدى .. برنامج على الهواء مباشرة لو كانت حلقة متسجلة ماكانش حصل كل دة ... الحمد لله و كامل اعتذارى بشكل اخوى لأختى الغالية هند سعيد صالح و للنجم الراحل سعيد صالح .