عمرو الليثي: هشام سليم كان بيساعد مرضى السرطان.. وقدر يوفرلهم 16 مليون جنيه

كشف الإعلامي عمرو الليثي، عن جهود الفنان الراحل هشام سليم في دعمه لمرضى السرطان، قبل وفاته، مشيرًا إلى أنه كان وفر أكثر من 16 مليون جنيه لهم.

وقال عمرو الليثي في فيديو عبر حسابه الشخصي بموقع التواصل الاجتماعي فيسبوك: حكايتي مع هشام سليم معرفة سنة 1987، وكنت مساعد مخرج وكان هشام لسة وجه جديد والناس حكمت إنه موهوب.

وواصل: تعرفنا ببعض في مسلسل بدري على الحب ونشأت صداقة متينة من أيام التصوير، والحقيقة هشام جميل ومحترم وخلوق ومهذب وعنده رأي، وحضرت خطوبته وكنت من القليلين اللي حضروا.

وأضاف: عام 2004 كان والدي ممدوح الليثي، بينتج فيلم أنت عمري، وقصة الفيلم اتنين جالهم مرض السرطان والدكتور اللي بيعالجهم كان هشام وكان البسمة والعنصر الإيجابي عشان يحبوا الحياة.

مواقف هشام سليم مع مرضى السرطان

واستكمل: وأنا كنت بصور معاه قالي المشاهد اللي بيصورها نيللي وهاني سلامة، وهما بياخدو كيماوي كانت صعبة وده تمثيل ما بالك في الحقيقة ربنا يكون في عون مرضى السرطان، والحقيقة هشام كان بيتكلم من وجه نظر إنسانية، وبعدها من 3 سنوات سجلت معاه حوار وحكالي قصة حياته، ودائمًا كنت بسأل سؤال أقوله تحب تعمل خير النهاردة في إيه.

وأردف: قالي يا ريت ندعم أطفال السرطان، لأنهم بيتألموا كثيرًا، وفعلًا بعدها روحنا عملنا زيارة لمستشفى 57 ومعهد الأورام كان محتاج أجهزة والحقيقة عملنا زيارة وطبطبنا عليهم وربنا أكرمنا وقدرنا نعمل حاجة كويسة، والحلقات دي دخلت حوالي 16 مليون جنيه للمعهد القومي للأورام.

واشار عمرو الليثي: دايمًا كنت على تواصل معاه، واتقابلنا صدفة من فترة واتكلمنا لمدة 3 سنوات، وبعدها بفترة عرفت إنه جاله المرض، سبحان الله له حكمة، ربنا يعافي كل مريض هشام يتوفى بمرض السرطان، هو كان عنده نوع من احترام الذات.

وأختتم قائلًا: مكنش بيحب يشوف الضعف لأنه إنسان مؤمن وتقي حتى وهو بيتعالج في المعهد القومي للأورام، ربنا يرحمه ويغفر له ويجعل هذا المرض في ميزان حسناته ويرحم كل موتانا بإذن الله.