رمضان عبد المعز: لازم نسجد لله ونصلي عشان مشاكلنا تتحل

تحدث الشيخ رمضان عبدالمعز، الداعية الإسلامى، عن الصلاة وفضلها، محذرًا من ترك هذا الفرض العظيم.

وقال «عبد المعز»، خلال حلقة برنامجه «لعلهم يفقهون»، المعروض على قناة «دي إم سي»، اليوم الاثنين، موجهًا حديثه لتاركة الصلاة: «ربنا قال اسجد، ترفض، حد يرفض السجود لربنا، حد يكره ويرفض القرب من ربنا»

وأضاف «إنت عارف إيه أقرب حاجة تنال بها القرب من الله، النبي يقول أقرب ما يكون العبد من ربه وهو ساجد، لازم تسجد».

وأوضح «عبدالمعز» أن «إبليس امتنع عن السجود، يجي بني آدم مسلم يمتنع عن السجود لربنا، إيه اللى منعك إنك تصلى؟ مش عارف؟ هنعلمك الصلاة، سهلة وبسيطة، بتنسى؟ هنقولك تفتكر إزاي، بتحس إنها تقيلة على قلبك؟ هنسهالك، إيه مشكلتك في الصلاة؟ مبتعرفش تتوضأ؟ مفيش أسهل من الوضوء».

وتابع: «والله العظيم مشاكلنا مش هتتحل إلا بالصلاة، مش هيبقى عندك هدوء نفسي واستقرار تعرف تحط راسك على المخدة وتنام إلا بالصلاة، حتى اللي بيصلي صلاتهم متوصلهمش من مكان ما أنا قاعد لحد باب الاستديو يعني حوالي 20 أو 30 متر».