خناقة «الخبير الكشكول» بين محمد نجاتي وديانا الضبع.. والسبب بوست لـ «لميس الحديدي»

تسبب تصريح للإعلامية لميس الحديدي حول سعر الجنية والدولار، الذي أدلت به خلال برنامجها “كلمة أخيرة”، والذي يعرض عبر مجموعة قنوات “on”، بنشوب شجار الكتروني بين الرائد في مجال ريادة الأعمال محمد أبوالنجا نجاتي، والكاتبة الصحفية ديانا الضبع.

وكانت بداية الأزمة عندما نشر محمد نجاتي منشور عبر حسابه الرسمي على موقع التواصل الاجتماعي يستعرض من خلاله رأيه حول تصريحات الإعلامية لميس الحديدي حول سعر الجنية والدولار، التي قالت فيها أن الدولة أنفقت خلال الأعوام الماضية الكثير من الأموال لدعم الجنية.

ليعلق نجاتي على التصريح قائلاً: الحل في زيادة الانتاج يا فندم ... مش كل شوية هنزود سعر الدولار ... مش هنخلص كدة... زيادة الانتاج و التصدير و تقليل الاستيراد و زيادة تحويلات المصريين بالخارج... نحل المشكلة بقي... منحلش تأثير المشكلة بمشكلة.

لتقوم الكاتبة الصحفية ديانا الضبع بإعادة مشاركة المنشور المصحوب بتعليق نجاتي وتعلق قائلة: مع احترامي للسيد نجاتي .. احنا لما نوقف دعم العملة مش معناها اننا ب"نزود" سعر الدولار لكن إحنا بنواجه الحقيقة والسعر الحقيقي للعملة بتاعتنا فبنبني على أساس واقعي وصحيح مش على أساس وهمي وعملة مدعومة وده لا يتعارض مع كل الحلول البديهية اللي هو ذاكرها وكأنه ذاكر حل غير مسبوق .. لغاية ماتزود الإنتاج هاتدعم العملة من فين؟ ولما فجأة تنهك من دعم العملة وتتكشف هانبقى نكلم حضرتك تنقذنا؟

وأختتمت: هو البديهي إن أي دولة تسعى انها تزود مصادر دخلها . . مش محتاجين نعرف الماء بالماء ظاهرة الخبير الكشكول اللي بيتكلم طول الوقت في كل موضوع وأي موضوع وحوليه دايرة تهليل دي من سوؤات السوشيال ميديا .. لكن كل واحد حر طبعا .

بوست ديانا الضبع تسبب في حالة من الجدل، ما ترتب عليه قيام محمد نجاتي بالرد عليها عبر حسابه على موقع التواصل الاجتماعي فيسبوك مرة أخرى قائلاً: هل ممنوع اني اقول رأيي علي رأي في تصريح خارج من برنامج حضرتك في فريق الاعداد فيه ؟ انا اتكلمت بكل ادب و لما اقول رأي غير الحضرتك عايزة تقوليه ابقي وحش؟

وتابع: عامة حلو لقب #الخبير_الكشكول دة معناه اني بفهم في كذا حاجة ...شكرا يا فندم انا بتكلم علشان بحب البلد دي و شغال فيها و بحاول اطور في مجالي و نفسي اقتصاد مصر يتحسن و يفضل يتحسن ... اسلوب الهجوم علي رأي مختلف تسبب في تهجير كوادر كتير اتمني مبقاش في يوم من الايام واحد منهم.

لم يتنهي الأمر عند ذلك الحد، فقامت ديانا بنشر منشور آخر عبر حسابها:طبعا الأستاذ نجاتي الخبير الكشكول المنشغل جدا جدا بترويج نفسه وبناء قاعدة جماهيرية اكتر من انشغاله حتى بانه يعرف عن الشخص اللي بيتكلم عنه او معاه بيدعي اني من فريق إعداد برنامج لميس الحديدي .

وتابعت: في دليل صغير قوي على الفتي والرزع .. الحقيقة يؤسفني أقولك اني مش من ضمن فريق إعداد برنامج الأستاذة لميس ولا عمري كنت. ولو حضرتك كنت كلفت نفسك وبصيت على الabout عندي أو لينكد إن كنت عرفت .. بس تتعب نفسك ليه وانت إنفلونصارز وعندك فوللورز؟

وتابعت: ماتنساش بقى تجيب جيوش المهاويس يقولولك نجااااااااااتشي انفخ البلالين عشان عيد الميلاد .. سوري أقصد نجااااااااااشي انت أحسن رائد أعمال في العالم

وأختتمت: ملحوظة: ولا فارقلي انشالله تجيب خمسين ألف واحد يهاجموني .. هوا