نادر أبو الليف: النقابة بيدخلها مليون جنيه يوميًا.. وكنت بموت في أزمتي الصحية ومفيش حد فيهم سأل عني.. وبحمد ربنا إني قدرت آخد نفسي من جديد |حوار

-كنت بموت في أزمتي الصحية الأخيرة والنقابة مسألتش فيا.

-دفعت في أزمتي الصحية 88 ألف جنيه من جيبي.

-لقيت حد في النقابة بيقولي سقفنا 15 ألف جنيه قولتلهم مش عايز حاجه.

-نقابة الموسيقيين أغنى النقابات في مصر وكل يوم بيدخلها مليون جنيه.

-بننتخب أعضاء النقابة لخدمتنا مش عشان يعملوا مصالح شخصية من ورانا.

-أنا مش غايب عن الساحة وبحاول أنزل كل فترة بعض الأغاني على اليوتيوب.

-بحمد ربنا إني بعد فترة تعبي قدرت أقف على رجلي وأخد نفسي من جديد.

يعتبر الفنان نادر أبو الليف من أبرز النجوم في الوسط الفني، حيث أنه يتمتع بصوت مختلف عن الموجودين في الساحة، وله تاريخه الفني الكبير، ولكن في الفترة الأخيرة تتدهورت حالته الصحية، ووقع في خلاف مع نقابة المهن الموسيقية بسبب عدم مساندتهم له، ولكن حاول تخطي أزمته والعودة للوسط من جديد، من خلال المشاركة في كليب “سلام للرجالة”.

وحاور موقع “بصراحة” الفنان نادر أبو الليف ليكشف تفاصيل عودته للغناء من جديد، وما هي تفاصيل أزمته مع نقابة المهن الموسيقية.

-في البداية.. ما هو سبب غيابك الفترة الأخيرة؟

أنا مش غايب عن الغناء طول الوقت، انا بحاول أنزل كل فترة على اليوتيوب أغاني ولسا منزل أغنية قريب اسمها الحفلة، وحققت نجاح كبير، وبحاول اكون مع جمهوري دايمًا.

-مين سبب مشاركتك في كليب سلام للرجالة؟

المخرج خالد مهران هو السبب لأنه صديق شخصي ومن الناس اللي بحبها، عملت معاه تجربة قبل كده في فيلم عالمي، وشارك فيه ابطال ايطاليين، وروسين، ومن هنا بدأت الصداقة، فلما جه يكلمني على كليب سلام للرجالة طبعًا وافقت رغم إني ضيف شرف بعمل الدخلة بس، فرحبت بالفكرة واشتغلت.

-كلمنا عن حالتك الصحية.. بعد أزمتك الأخيرة؟

حالتي الصحية الحمد لله، بحمد ربنا اني قادر اقف على رجلي، واخد نفسي، من جديد بعد ما كنت خلاص بموت، بس الحمد لله جت سليمة وحالتي تحسنت.

-ما هو سر خلافك مع نقابة المهن الموسيقية؟

احنا بننتخب اعضاء مجلس النقابة لخدمتنا، والعاملين في النقابة مش بننتخبهم لاغراض شخصية ليهم ولمصلحتهم، أنا المفروض ان انا عضو قديم وليا تامين صحي وجمعية عمومية وبدفع اشتراك سنوي وبدفع ضرايب لما بعمل حفلة او حاجه فالنقابة كده بتاخد حقها، فالمفروض لما اقع في ورطة النقابة تسندني، مش تسبني هي سندتني في 2015 وكان هاني شاكر بردوا النقيب.

-اتعاملت ازاي مع أزمتك الصحية الأخيرة؟

المره الأخيرة دي النقابة معملتش ليا أي حاجه وكانوا عايزين يوهموني فكنت خلاص بموت، فقولت للمدام اطلبيلي اسعاف اروح مستشفى تانية فالمستشفى عالجتني وخففتني وعاملتني معاملة آدامية كأني فنان واستقبلوني استقبال كويس، ودخلتني عناية مركزة على سرير، ودفعت 88 ألف جنيه، فالمفروض النقابة بتاعتي لما اجي اقدم الفتورة فالمفروض النقابة تطلعلي 75%، وأنا اشيل 25%، فالاستاذ حمادة أبو اليزيد قالي سقف النقابة 15 ألف جنيه، مش فاهم ازاي المبلغ ده، وعايزني ادخل مستشفى تبع النقابة ازاي وانا حالتي متسمحش، اخش اي مستشفى ولا اموت.

-هل النقابة تحصل على دخل كبير؟

النقابة كل يوم بيدخلها فوق الـ مليون جنيه، وفي ناس بيدفعلها اللي هما بيطلبوه، اما انا زميلك وأخوك ومتربيين سوى، تعملوا معايا كده.

-مين الأفضل لتولي منصب النقيب؟

التلاتة المرشحين أخواتي مقدرش أقول حد معين، لكن اللي أقدر اقوله إن في اتنين كانوا أعضاء في المجلس ماسكينه متحركوش ومظهروش الاخطاء والعيوب إلا لما هاني شاكر استقال، طب انت كنت فين من الاول، كنت قدمت من الاول، لكن ربنا يولي من يصلح، واحنا زمله.

-هل النقابة اتخذت إجراء قانوني ضدك؟

محدش كلمني وخاطبني قانونًا من النقابة بعد تصريحاتي الأخيرة،ومحدش كلمني أنا قدامك اهو.

-كلمنا عن مسرحيتك الأخيرة “عزيز وغالي”؟

مسرحية عزيز وغالي، حققت نجاح كبير، رغم ان جمهور اسكندرية جمهور زواق بيقدر الفن، فالفن لو مش رسالة كويسه مش بيجي، فكون ان كل يوم اروح الاقي ناس كتير يبقى ده انجاز كبير، في بلد زي الاسكندرية.