اتبهدلت أوي وعلاقتي بربنا اتحسنت.. هدى المفتي تحكي تجربتها الأليمة بعد استئصال جزء من الأمعاء

كشفت الفنانة الشابة هدى المفتي، تفاصيل الأزمة الصحية التي تعرضت لها وإصابتها بجلطة واستئصال جزء من الأمعاء بعد إجراء عملية جراحية كبيرة.

وقالت هدى، ببرنامج "معكم منى الشاذلي": "أنا من الناس اللي رجعت من الجونة بالكورونا، خلصت الكورونا وما أخدتش أدوية سيولة، فحصل لي جلطة بعدها بكذا شهر، ومعرفتش بيها".

تصريحات هدى المفتي مع منى الشاذلي

وتابعت: "الجلطة كانت في الوريد اللي بيوصل دم للأمعاء، وكنت بحس بحرقان وحاجات غريبة ونومي غريب، وكنت فاكرة أن عندي حاجة في القلب، وعملت رسم قلب لقيت مفيش حاجة".

واستكملت: "وفي رأس السنة كنت مسافرة مع واحدة صاحبتي إلى الأقصر وأسوان، وفجأة هناك تعبت تعب مش طبيعي، ووجع مؤلم في حياتي مشوفتهوش، وكنا في مركب وعلقوا لي محاليل، واتبهدلت، ولولا صاحبتي كانت معايا مكنتش هبقى موجودة، وكانت بتديني الدواء".

وأوضحت: "قطعت الإجازة ورجعت القاهرة بطيارة، دخلت المستشفى والدكاترة مفيش حد عارف أنا عندي إيه وبطني عمالة تتنفخ، وأنا مكنتش فاهمة، وقرروا يعملوا عملية، وقولتلهم مفيش مشكلة افتحوا بطني، بس عايزة أخلص من اللي أنا فيه".

تعرضهدى المفتي لجلطة بالأمعاء

وتابعت: "الجلطة كانت في الوريد اللي بيوصل دم للأمعاء وبسبب عدم معالجته بسرعة عملغرغرينافي الأمعاء، وتم استئصال جزء من الأمعاء، والعملية كانت كبيرة وقعدت في العناية المركزة شهر وشوية، وكان ممنوع الزيارة والأكل، اتبهدلت أوي، وكانت تجربة وحشة أوي، وعلمتني حاجات وخلت يبقى عندي أولويات معينة، وبدأت أفكر في حاجات بحياتي، خلاص لازم تتلغي، وعلاقتي بربنا اتحسنت أوي بعد الموضوع ده".

واستكملت: "كنت في الأوضة 24 ساعة عيانة، وأختي الكبيرة بس اللي كان مسموح لها تدخل الأوضة، ومن كتر الأدوية، كنت بنسى اللي بره دول مين؟، عارفة العيون بس مش فاكرة الاسم إيه".

وأضافت: "التجربة كانت عميقة، اللي بقوله ده السطح، بس بجد مبحبش أتكلم فيها، عشان في ناس ممكن تقول إني عايزة أكسب تعاطف الناس، وأنا أخر واحدة تعمل كده، واتعلمت أن أي حاجة ولها أخر، السعادة مؤقتة والوجع مؤقت، وكل حاجة مؤقتة، أنا حاليا واخدة إجازة مابعملش حاجة غير إني أشتغل ومركزة في صحتي النفسية".

وأنهت حديثها: "أنا قافلة على نفسي شوية سنة كدا بتعافى من أي علاقة قديمة، علاقة صداقة سامة، علاقة عاطفية سامة، عمل قدمته محققش النجاح اللي مستنياه، وأشتغل على مستقبلي، واقرأ واشتغل على نفسي كروح وإنسان، فقررت ما أركزش مع حاجة غير نفسي".