ظلموني عشان ماليش أب ولا أم.. مصر للطيران تستبعد «طالب هندسة» بسبب تخرجه من دار أيتام

ظلموني عشان ماليش أب ولا أم، بهذه الكلمات اشتكى "يوسف علي" الطالب بكلية الهندسة، من استبعاده من مصر للطيران بسبب عدم استيفائه بيانات الأم والأب بسبب تخرجه من دار أيتام.

وقال يوسف علي، خلال صفحته على فيسبوك: " مكنتش متخيل اني ممكن في يوم اقول كده بس انا بجد تعبت من السخافة و تعبت من كتر معمال اعدي في مواقف بايخة و سخيفة بسبب حاجة انا مخترتهاش. الي ميعرفنيش كويس انا من يوم مفتحت عيني ع الدنيا و انا موجود في بيت لرعاية الايتام و طبعا مش محتاج اتكلم عن كم التفرقة و العنصرية و نظرات التقليل الي الواحد بيتعرضلها من و هو صغير. الحمد لله اجتهدت كتييير جدا في حياتي و طلع عيني و ربنا وفقني و اخدت منحة لدراسة الهندسة الميكانيكية في الجامعة الامريكية ال AUC.".

وأضاف: " أي طالب في هندسة بننزل في الصيف ندور ع تدريب عملي علشان ننمي مهارتنا و نتعرف ع سوق العمل و كمان علشان مينفعش نتخرج من غير عدد ساعات تدريب عملي معين. قدمت علي تدريب صيانة تابع لمصر للطيران و حقيقي كنت متحمس جدا اني هشوف ورش ضخمة و معدات كتيرة و هسمع من مهندسين بقالهم كتير في المجال و اخد من خبرتهم. المهم النهاردة كنت رايح انا و مجموعة من زمايلي في الجامعة نحضر اول يوم تدريب في مصر للطيران . فضلوا ينادوا علي اسامي الناس الي هتحضر التدريب العملي بتاع الصيانة و دوناً عن كل زمايلي الي معايا في الجامعة اسمي متنداش. فطلعت علشان اشوف المشكلة في ايه لاقيتهم بيقولولي انهم نقلوني تدريب تاني اسمه التمثيلي او ال simulator و طبعا ده مش في الورش و الهناجر بتاعة المطار ده بيبقي في فصل عادي مفهوش حاجة عملي. طب نقلتوني ليه؟ علشان انا مجاليش موافقة امنية علشان اخش الورشة طب ليه؟ علشان في استمارة الموافقة الامنية بيطلبوا بيانات الاب و الام و طبعا دي خانة فاضية عندي مفهاش غير اساميهم الي الدولة حطتها في شهادة الميلاد. معرفش مهنتهم ولا رقمهم القومي لانهم ببساطة مش موجودين اصلا و محدش يعرف عنهم حاجة".

وتابع الطالب عبر صفحته الشخصية: " قولتلهم طيب هم مش موجودين اعمل ايه؟ حاولت افهمهم اني من دار و ان مفيش بيانات متوفرة علشان اكتبها في الخانة غير الاسم بس. قالولي مش هينفع لازم تملاها كلها. حاولت اعرض اني اجيب جواب من البيت بيثبت اني من ابناء مصر الايتام و مقيم في دار رعاية من ونا صغير اخدوا الحوار لاتجاه الي هو ماله ياحبيبي ال simulator ده انت هتتبسط اوي جوا و هتستفاد".

وأوضح طالب الهندسة: " انا بجد حسيت بظلم كبير اوي النهاردة انا من حقي انزل تدريب عملي في الحاجة الي انا حاببها. من حقي انزل تدريب عملي زيي زي الناس الي كانت موجودة هناك و من حقي انزل تدريب عملي زي زي زمايلي الي في الجامعة الي بنبقي قاعدين في نفس المحاضرة و بنسمع لنفس الدكتور، ومن حقي و من حق كل الناس الي ظروفها زيي ان يبقي حسابنا معمول في النظام و في الية معينة بتتعامل مع فاقدين الرعاية الابوية و الايتام لان احنا مش قليلين احنا كتار و الي حصل معايا النهاردة ممكن يحصل مع مليون واحد غيري. من حقي اني اتعامل زي بقيت الناس العادية لان محدش احسن من حد. من حقك انك تستعلم عني بس مش هخترع اهل علشان تستعلم عنهم".