"ضوافر مراتي مبتطولش".. هاني الناظر يقفل تليفونه بسبب شكوى غريبة

استقبل الدكتور هاني الناظر، استشارى الأمراض الجلدية، مكالمة غريبة في تمام الساعة الثانية والنصف ليلاً، كانت السبب في استيقاظه، بشكوى غريبة جاءت من أحد الرجال ، عن زوجته .

وكشف الناظر، تفاصيل المكاملة المفاجئة التي جاءت له في تمام الساعة الثانية والنصف ليلاً، وذلك عبر حسابه الرسمي بموقع التواصل الاجتماعي الفيسبوك، حيث روى الناظر تفاصيل ما حدث على هيئة سيناريو سينمائي.

وكتب هاني الناظر يقول: حكايات الإجازات.. حكاية النهاردة مختلفة تماما وزوجتي شاهدة عليها!، الموبايل رن الساعة اثنين ونصف بالليل!، طبعا أنا اتخضيت أكيد في شيء خطير!

ألو دكتور هاني؟

أيوه يا أفندم.

معلش آسف يا دكتور أنا عارف إن حضرتك إجازة والوقت متأخر، أنا فلان الفلاني!

خير سيادتك في مشكلة كبيرة؟

فعلا يا دكتور وهي عند زوجتي مش عندي!

ربنا يستر أيه في مياه مغلية وقعت عليها؟

لا

أمال إيه نار ولا حاجة؟

لا

طيب حاجة عضتها أو قرصتها؟

برضه لا يا دكتور

أمال إيه خير؟

الحقيقة هي مش عارفة تنام وصممت إني أكلمك علشان بتشتكي بقالها مدة من أن أظافرها مش بتطول وعاوزة حل للمشكلة!

وأضاف هاني الناظر عبر منشور له على صفحته الرسمية بموقع فيسبوك: "أنا سكت ومعرفتش أرد، وقفلت السكة والموبايل ومن ساعتها مش عارف وبسأل نفسي أنا كنت المفروض أرد وأقول إيه!".