أمي مبتحبش محمد جوزي.. أمينة الإيطالية تكشف تفاصيل هروبها من روما وعودتها لزوجها المصري

بعد عودتها إلى زوجها المصري في محافظة الفيوم، علقت السيدة الإيطالية ديسيريه مانكوري، أو كما يطلق عليها امينة الايطالية على احتجاز والدتها لها في المنزل تحت حراسة الكلاب عقب سفرها إلى ايطاليا، قائلة: «الكلاب بتنام مع أمي في أوضة واحدة، وعددهم 14 كلبا»، مضيفة أنها وأولادها كانوا ينامون في غرفة واحدة بها سريران فقط.

وأضافت أمينة: «أنا كنت عيانة، كنت هموت ورجلي وجعاني، ورحت المستشفى، قالولي إن في حاجة في ضهري، عشان كنت بقف علطول عشان بنضف للكلب»، مضيفة «كنت بعيط وأمي نايمة، ومش بتفكر في إني عيانة ولا بتجيبلي العلاج».

وتابعت: «كنت باكل مرة واحدة بس في اليوم، والفطار مفيش، وكنت ببقى عايزة قهوة تاني بيقولولي مفيش»، مضيفة أن «الأكل بتاعي كانوا بيدوه للكلب».

وقالت: «الصبح الكلاب كانت بتعمل حمام في الأرض، وأنا اللي كنت بنضف على طول وبكنس وبمسح».

وعن سبب سوء معاملة والدها لها ولأولادها، قالت «أنا وأخويا متربيين مع واحدة تانية، هي زي أمي بس، وهي مكانتش بتحب محمد جوزي خالص».