ميما الشامي توجه رسالة لخالد عليش:"للأسف البنت هتدفع تمن ترنداتك"

قامت ميما الشامي، طليقة المذيع والفنان خالد عليش، بتوجية رسالة له، بعدما قام بنشر صورة محضر له من قبلها، عبر مواقع التواصل الاجتماعي.

ووجهة طليقة خالد عليش رسالة له عبر حسابها الشخصي بموقع التواصل الاجتماعي "فسبوك"، قائلا :" لو في حد محتاج توضيح او هيفهم هي ميما، للاسف عمري ماكنت هحكلها حاجة وربنا الشاهد على قراري كنت بحاول وكل المحاولات فشلت، والطرق الودية مكنتش نافعة واقسم بالله العظيم دة اتقلي واتقال لاخواتي واصحابي قضية الرؤية، انا رفعتها عشان اكسرك بس انتي مبتتكسريش".

وتابعت:" هي الناس اللي بتهاجم وبتتكلم وبتقولو مبروك، انا ياجماعة كنت مدياله اكتر من ١١ ساعة وعشان فلوس اعترض على الاستضافة ويشهد ربنا عليا، وعمر مالبنت كملت معاه ٨ ساعات وكان بيرجعها

انا بس عايزة اقلكم ان الموضوع مليان تفاصيل كتير".

واضافة:" كل كلامي مع الطرف الآخر مهما كان مين اللي غلط واللي بيعند بلاش التشهير بلاش نكتب للناس مش هنوصل لحل بلاش عشان ميما، على كلامك ربنا نصرك(مع اني شايفة انك كنت واخد اكتر من الحكم دة بالود) اتبسط وابعت اي كلام مؤذي ليا وللي حوليا واعمل كل اللي انت عايزه فيا بس في الاخر ميما مش هتعرف، بس لما الناس عرفت اية الفكرة والله مش مستوعبة".

وأوضحت، قائلة :" معنديش مشكلة برضو ان الناس تعرف بس ليه

كلامنا في الموضوع دة حقنا احنا التلاته ليه تاخد قرار نيابة عنها وندخلها فيه.. لية في مدرستها والنادي من حق كل الناس توقفني تسألني عن صحة اللي بيتقال لية البنت تسمع كلام عن مامتها وباباها

عشان حد فينا ينتصر ؟".

وتابعت:"طيب من وجهة نظركم اللي انتصر خلاص انتصر وبين وجهة نظره".

وأكدت:" انا اقدر اتكلم واطلع لايف وبرامج ومعايا الادلة بس والله العظيم انا مبفكرش في اني أبان صح، انا بفكر في بنت ملهاش ذنب من حقها كانت تعيش في سلام بنا حتى لو حد فينا سيء.. مين الصح او مين الغلط ربنا اللي يحكم مش الناس".

وأشارت:" طبعا انا حاولت اقول الكلام دة للطرف التاني كتير، انا بعدت بعدت من زمان قوي وبعدت جدا عن كل حاجة، ومش عايزة انتصر ولا اكسب التعاطف يارب كل الناس تقول غلط بس بعيد عن بنتي".

واوضحت:" لو بايدي دلوقتي اعمل اي حاجة عشان اسم بنتي ميبقاش متداول بالشكل دة كنت عملت، رجاء وتوسل مني الناس مش عارفين اي حاجة".

وتابعت:" قرار المحكمة ليس انتصار ومش ضد رغبتي بس للاسف انت خسرت خسرت أنه مهما المشاكل كانت بنا كانت هتفضل بنا وكان ممكن يوم تتنسي ومتوصلش لبنتنا، للاسف هتفضل البنت تدفع ثمن شهرتك وترندات اتعملت عليها، ارجوكم التزموا الصمت عشان خاطرها مش عشاني".

واختتمت حديثها، قائلة:"آسفة مرة تانية انا مش هعمل اي حوار مش هدي اي تصريح مش هطلع اي لايف ولو بايدي اعمل المستحيل عشان اشيل صور بنتي من الأخبار اللي نزلت عننا، بيتهيالي كده كل حد كان نفسه في حاجة عملها وكل كان نفسه في حاجة قالها وكل اللي كان عايز يبان انه بيدعم بان كفاية بقى وكل واحد يشوف حاله وحياته وشغله ونفكر بعقل ازاي هتعدي البنت المحنة دة وتبقى سعيدة ومبسوطة مع كل اللي بيحبها وميضرهاش، وربنا يكتب للجميع الخير ويهدي كل واحد غلط في حقها".

وكان خالد عليش، نشر عبر حسابة الشخصي بموقع التواصل الاجتماعي "فيسبوك"، صورة من محضر جديد ضده من قبل طليقته.

وعلق عليش على المحضر، قائلا:" الحقيقة انا مبلم بقالي شوية من ساعة ما قريت ده و مش مصدق".

وتابع:" ده محضر معمول فيا من ١٢-٢-٢٠٢١ انا لسه مكتشفه بعيدا ان هو بيأكد صدق روايتي اني مش عارف اشوف بنتي بشكل سليم في الوقت ده و ده اللي خلاني الجأ للعقد اللي بينا و عمل إلزام بما فرضته نفسها على نفسها و المحكمة حولته لرؤية فى مركز شباب وبعدها روحت و ما كملتش و القصة الطويلة العريضة في البوست اللي فات".

وأضاف:" بس مش قادر اصدق ان ده محضر اتعمل فيا..مش قادر افهم يعني ايه خدتها و مأكلتهاش..يعني ايه ما اديتهاش الادوية..يعني ايه ببعت اشخاص غريبة تجيبها..يعني ايه بتاجر بصورها..طب ليه عايز اشوفها ؟ طب ليه بعمل كل ده".

وأشار:" انا قلبت في الموبايل عشان اشوف في التاريخ ده يمكن فعلا عملت حاجة تضايق لقيت اني ماشفتهاش يوم ١٢ اصلا و بعدها بيومين جبتلها هدية عشان الڤلانتين، في الاخر يتعمل فيا محضر و يتقال عليا الكلام ده من ورايا ..ليه كل ده ؟؟؟ !!! ؟؟؟".

متسائلا:"هل يريح الام و أصحابها اني اطنش و اكبر دماغي و اسيب البنت و ما اشوفهاش خالص".

واختتم حديثة، قائلا:"بالمناسبة المحضر ده تم نشره عن طريق الام مش انا اللي عرفته لوحدي..انا بجد مش مصدق و كإن في إصرار اني انا اطلع وحش وخلاص.. بنا يهدي".