خدت حكم تاريخي اليوم.. أول تعليق لخالد عليش بعد حصوله على حكم برؤية صغيرته

علق الإعلامي خالد عليش، على الحكم الصادر من محكمة الأسرة بمدينة 6 أكتوبر، اليوم، حكما لصالح الإعلامي خالد عليش، بإلزام مطلقته، بتمكينه من رؤية صغيرته لمدة 11 ساعة إسبوعيًا يوم الجمعة.

وقالخالد عليش، عبر صفحته الشخصية على الفيس بوك: “النهاردة انا خدت حكم تاريخي يارب يتنفذ علي خير..وتاريخي لأنه احسن حكم ممكن اخده في ظل ظروف قانون الاسرة السيئ لحين تعديله..و اللي طلع الحكم قاضي مش واحد صاحبنا ف ده معناه ان الراجل قره و فهم و بيدي لكل واحد حقه”.

وأضاف: “لكن جه الوقت اللي اقول فيه اللي جوايا..حسبي الله و نعم الوكيل..انا خصيم لكل واحد او واحدة حتي يوم الحساب ساعدو بشكل مباشر او غير مباشر اني ما اشوفش بنتي بطريقة انسانية..كل حد كبير او صغير جريت وراه بالمكالمات عشان اشوف اي حلول ودية..حتى الحركات و الجروبات النسوية اللي بيدافعو عن الست و خلاص”.

وتابع: “اي حد بيكتب تعليق و هو مش فاهم حاجة..فاض بيا الكيل و العمر بيعدي و استحملت الكثير من الاتهامات الباطلة و علاقتي ببنتي بتبوظ يوم بعد يوم..و انا ملتزم بكافة الالتزامات المادية ناحيتها من اول يوم كاملة و زيادة كمان عن المستوي المادي و الاجتماعي اللي عايشين فيه و مع ذلك استحملت كتير و ماردتش”.

واستكمل: “انا لا حول لي ولا قوة حاولت مع كل الحلول الرسمية و الغير الرسمية..تعبت من اللف في دوائر مغلقة..تعبت من نظرة والدي و والدتي المريضة اللي نفسهم يشوفو حفيدتهم و مش قادر اعملهم ده..انا اوحش رجل في العالم و لكن ما استحقش اني ما يكونش عندي فرصة اتكلم و اخرج معاها و افسحها عشان علاقتي بيها تبقي كويسة”.

وتابع: “محدش يقولي انت السبب عشان سيبت ماماتها..انا و والدتها كان في بينا عشرة طيبة و ايام كتير حلوة ولكن لم يحالفنا التوفيق في النهاية و كل شئ نصيب و الانفصال كان برغبتها قبل رغبتي..محدش يقولي ما انتا كنت زوج وحش..انا يمكن مكنتش احسن زوج برغم اني عملت اللي عليا كتير و اجتهدت كتير عشان اسعد الطرف التاني ولكن ده مش معناه اني انسان وحش و مستحقش فرصة تانية ومستحقش اشوف بنتي”.

واستكمل: “محدش يقولي ما انتا مبسوط و اتجوزت تاني..انا فعلا الحمدلله زي الفل و مبسوط اني اخدت فرصة تانية ربنا يكرمني فيها و اكون انسان افضل و استمتعت ب حق ربنا سبحانه و تعالي و المجتمع اداهوني اني اتجوز تاني بعد انفصالي رسميا باكتر من سنة بس مش معنى كده اني ارمي طفلي مع امه و مطلوب مني انساه”.

واستطرد: “محدش يقولي ما انتا كنت بتشوفها..انا فعلا مع بداية الانفصال كنت بشوفها ساعات قليلة في الاسبوع بس مع اي تصرف ما يعجبش ماماتها تقولي اصل البنت مش فاضية عندها عيد ميلاد عندها تمرين و وسط شروط كتير منها متتصورش معاها و تنزل ليها صور - متوديهاش عند اهلك - تيجي عيد الميلاد لوحدك بدون باباك او ماماتك..حسيت في الوقت ده اني لازم استخدم التعاقد اللي بيني و بينها اللي بيقول اني اخد البنت يوم في الاسبوع و لكن القانون اداني حق الرؤية الطبيعي الغير انساني لطفل”.

وتابع: “فضلت ٥ شهور في مساومات اني معملش تنفيذ لحكم الرؤية حفاظا علي البنت و لكن ماماتها صممت و بعد التنفيذ كان مهانة و مذلة للطفلة و ليا بعدها مبقتش اروح و بعت انذار رسمي ليها بكده و مازلت في الاجرأت القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي و مناسب..محدش يقولي ما انتا ما بتصرفش عليها و مبهدل ماماتها في المحاكم”.

وأضاف: “برغم ان مش ده الموضوع بس الحمدلله الفلوس اللي الام طلبتها كنفقة و مصاريف بتوصل كل اول شهر بدون اي محاكم من اول يوم حصل بينا انفصال رسمي بدون محكمة بعقد اتفاق بينا و لو حصل دخول محاكم في اول الخلاف ف الام اللي بدأته وده بالتواريخ مش بالكلام..موضوع ان في مصاريف زيادة بتطلب بشكل مبالغ فيه دي قصة تانية فيها نقاش و حوارات كتير و مع ذلك قولت انا عندي استعداد لأي زيادة غير منطقية بس نقعد و نتناقش”.

وتابع: “محدش يقولي روح شوفها عند جدتها عشان انا مش هاعرف يبقي في علاقة طيبة بيني و بين بنتي و انا قاعد معاها ساعة عند جدتها و هما قاعدين جنبي و قعدتي تبقى كلها مذلة و مهانة..محدش يقولي انتا بتتظاهر انك عايز تشوف بنتك لكن انت مش فارق معاك..الابهات هنا اللي هيحسو قد ايه دي حاجة مؤلمة و انا مش محتاج اعمل ده و طول الوقت طلبت من اي حد قريب منهم ان احنا ننزل و نقعد و نوصل لحل وسط انا مش طالب فيه غير اني اخد بنتي يوم في الاسبوع اخرجها و ارجعها”.

واستكمل: “انا نفسي احس بحضن بنتي بقالي اكتر من سنة و مقعدش اتكلم في مشاكل حصلت من سنين..انا اوحش رجل في العالم بس حقي اخد فرصة عشان تكون في علاقة كويسة بيني و بين بنتي..حسبي الله و نعم الوكيل..شكرا للاستاذ شعبان سعيد المحامي و ربنا يكملها بخير..شكرا ميريهان زوجتي انك مستحملة كل ده و في ضهري و مؤمنة بيا”.