ضحى بالتاكسي عشان ينقذ طفلين.. شهامة شاب تتسبب في خسارته لمصدر رزقه الوحيد 

ضحى الشاب محمد جمال بمصدر رزقه (تاكسي) من أجل إنقاذ حياة طفلين، قائلا: كنت سايق ومعايا والدي على الدائري محطة الجامع وماسك الحارة الشمال في الطريق وماشي بسرعة متوسطة، فجأة ظهر من بعيد طفلين حوالي 10 سنين بيعدوا الطريق لوحدهم، بعدت عنهم وحاولت أروح للناحية اليمين هما رجعوا لورا تاني وكانوا مترددين وخايفين، وفجأة مكنش في حل قدامي يا هشيلهم بالعربية يا هدخل في السور علشان أفاديهم.

وأضاف أن عبور عربية مقطورة على يمينه في نفس اللحظة الأمر الذي منعه من التمكن من عبور الطريق للناحية اليمين واتخذ قرارا سريعا واصطدم بالسور الحديدي للكوبري بقوة.

وتابع: دخلت في السور مفكرتش لحظة ومش مصدق إني طلعت بخير من العربية أنا ووالدي لأنها اتعجنت، وخرج الشاب بكدمات متعددة في الجسم.

وأكد: التاكسي ده مورد الرزق الوحيد لأسرتنا، أبويا اشتراه وبشتغل عليه وأوقات أخويا الكبير بيشتغل معايا عليه ومش معانا المبلغ ده، حيث يعاني الأب من أورام سرطانية متعددة بالكبد ولا يقوى على العمل.