أحمد موسى: اللي يكسر لوح زجاج في القطارات يدفعه هو وأهله

علق الإعلامي أحمد موسى؛ على تعمد البعض اتلاف القطارات الجديدة والتي أنفقت الدولة عليها مليارات الجنيهات حتى تقدم خدمة نقل أمنة وأدمية للمواطن.

وقال موسى خلال برنامج "على مسؤوليتي" المذاع على قناة "صدى البلد": "البلد دافعة مليارات عشان تصلح السكة الحديد وبقي عندنا عربيات درجة تالته محصلتش في مصر؛ العربيات دلوقت بتتكسر؛ العيال بيكسروها وناس تشرب سجاير على الكرسي ويقع منه أيه على الكرسي ويبوظه".

وأضاف: "مليارات من دم قلب الشعب وتيجي ناس تبوظ؛ دا لسة ممشيش القطر ويادوب راح كام رحلة والعيال عمالة ترمي طوب وواحد بيشرب سيجارة على العربية واللي جايب سكينة وبيقطع في الكراسي".

وتابع: "القطر اللي لسة بشمعه بيتبهدل؛ هل دة يرضي ربنا؟ فين يا جماعة العيال اللي بتطلع على خطوط القطارات فين أسر العيال دي؛ القطر الفاخر الروسي".

وأكمل: "معقول في ناس لحد دلوقتي يبهدلوا الخدمة ووسائل المواصلات؟ دي فلوسك وتمن دة أنت بتدفعه كمواطن أنا بطلب على الهواء اللي يكسر لوح أزاز دة يدفعه هو وأهلة ومتبقاش العملية سايبة وهو أنت دافع كام في التذكرة بتنتقم من القطر؟".