إيمان عبد الغني تكشف لـ«بصراحة» تفاصيل ألبومها المنتظر بكلمات بهاء الدين محمد .. «نفسي أعمل دويتو مع تامر عاشور وأنغام»
تبدأ إيمان عبد الغني مرحلة جديدة في مشوارها الفني، بخطوة تحمل لها الكثير من الحماس، مع اقتراب طرح ألبومها المنتظر، الذي تتعاون فيه مع الشاعر الكبير بهاء الدين محمد.
إيمان لا تتعامل مع الأغنية باعتبارها مجرد كلمات ولحن، لكنها تبحث دائمًا عن العمل الذي تشعر به أولًا، وتجد فيه شيئًا يشبهها ويستطيع أن يصل إلى الجمهور ببساطة وصدق.
وفي حوار خاص مع «بصراحة»، تكشف إيمان عبد الغني تفاصيل الألبوم الجديد، وتحكي عن تعاونها مع بهاء الدين محمد، كما تتحدث عن عمرو دياب، وتكشف عن أمنيتين فنيتين تتمنى تحقيقهما، هما تقديم دويتو مع تامر عاشور وأنغام، مؤكدة أن أعمالهما قريبة جدًا من قلبها.
حوار فيه كثير من الحكايات عن الفن، والاختيارات، والأغاني التي تترك أثرًا في القلب.. وإلى التفاصيل.
في البداية.. ماذا عن ألبومك المنتظر؟
الألبوم بالنسبة لي تجربة مهمة جدًا، وأنا سعيدة بكل خطوة فيه. فيه مجموعة أغاني اخترتها بعناية، وبشتغل عليها مع أهم الأسماء القدير بهاء الدين محمد. أتمنى إن الألبوم يطلع بالشكل اللي أنا متخيلاه، والأهم إنه يعجب الجمهور ويحسوا بالمجهود اللي اتعمل فيه.
وماذا يعني لك التعاون مع بهاء الدين محمد؟
التعاون مع بهاء الدين محمد أسعدني جدًا، لأنه شاعر كبير وله تاريخ وبصمة واضحة في الأغنية المصرية. كلماته فيها إحساس خاص، ولما تشتغلي مع اسم بحجم بهاء الدين محمد بتحسي إنك أمام تجربة مختلفة، وأنا سعيدة جدًا إن فيه عمل يجمعنا.
بما أنك تتعاونين معه.. كيف ترين تجربته مع عمرو دياب؟
بهاء الدين محمد من أسرار نجاح عمرو دياب، وقدم معاه مجموعة كبيرة من الأغاني المهمة جدًا، واللي أصبحت علامات في مشواره. هو شاعر بيعرف يكتب كلام قريب من الناس، ودي من أهم نقاط قوته، ولذلك أعتبره واحدًا من الأسماء المؤثرة جدًا في تاريخ الأغنية المصرية.
هل هناك فنان أو مطربة تتمنين تقديم دويتو غنائي معهما؟
نفسي أعمل دويتو مع تامر عاشور وأنغام، وأتمنى جدًا إن الفكرة تتحقق في الوقت المناسب ، تامر عاشور بحبه جدًا كفنان، وبحب اللون اللي بيقدمه، وأغانيه قريبة جدًا لقلبي، وأتمنى لو حصل تعاون بيننا يكون فيه إحساس حقيقي ويقدم حاجة مختلفة للجمهور.
أما أنغام، فهي قريبة جدًا من قلبي. أنا بعشق أغانيها وإحساسها وطريقتها في الغناء، وبحس إن بينا حاجات مشتركة، وإن إحنا قريبين من بعض في بعض التفاصيل الفنية والإحساس، ولذلك أتمنى جدًا إن تجمعنا أغنية في يوم من الأيام.
ولو تحقق الدويتو مع تامر عاشور.. هل تتمنين أن يكون من ألحانه؟
طبعًا، أتمنى ده جدًا. بحب ألحانه وأغانيه، وأشعر إن اللون اللي بيقدمه قريب مني، وممكن نعمل مع بعض حاجة حلوة ومختلفة، خصوصًا لو الأغنية فيها إحساس حقيقي.
ما أكثر شيء يجذبك في تجربة تامر عاشور؟
إحساسه، وطريقته في التعبير عن المشاعر. فيه أغاني له بحس إنها بتتكلم عن حاجات ممكن أي حد يعيشها أو يحس بيها، وده شيء مهم جدًا بالنسبة لي في الأغنية.
وماذا تمثل أنغام بالنسبة لك؟
أنغام بالنسبة لي مطربة كبيرة جدًا، وليها إحساس وصوت وطريقة خاصة بيها. أنا بحب أغانيها وبعشقها، وقريبة جدًا من قلبي، وبحس إن فيه حاجات مشتركة بينا ممكن تخلي الدويتو بينا له شكل خاص.
وماذا يمثل عمرو دياب بالنسبة لك؟
عمرو دياب حالة فنية كبيرة ومستمرة. قدر على مدار سنوات طويلة إنه يحافظ على وجوده، وفي نفس الوقت يطور نفسه ويتغير مع كل مرحلة. وده شيء مش سهل، لأن الاستمرار والتجديد محتاجين شغل وتركيز طول الوقت.
كيف تختارين الأغاني التي تقدمينها؟
أهم حاجة عندي إني أحس بالأغنية وأكون مقتنعة بيها. ممكن أغنية تكون حلوة جدًا، لكن لو أنا مش حاساها، مش هقدر أقدمها بالشكل اللي أتمنى. أنا بدور على الأغنية اللي ألمس فيها حاجة حقيقية وتوصل للناس.
هل أصبح إرضاء الجمهور أصعب في الوقت الحالي؟
الجمهور دلوقتي عنده اختيارات كتير جدًا، وبيسمع كل الألوان، وده طبيعي يخلي الفنان يفكر أكتر قبل ما يقدم أي حاجة. لكن في النهاية، الأغنية الحلوة والصادقة بتوصل، والجمهور بيحس جدًا بالحاجة اللي طالعة من القلب.
هل يشغلك الانتشار وتحقيق نسب مشاهدة كبيرة؟
أكيد الانتشار مهم، وكل فنان نفسه يوصل لأكبر عدد من الناس، لكن مش ده هدفي الوحيد. أنا الأهم عندي إني أقدم حاجة أحبها وأكون مقتنعة بيها، لأن ممكن أغنية تحقق انتشارًا كبيرًا، لكن الأهم بالنسبة لي إنها تفضل عايشة مع الناس.
وماذا تقولين للجمهور الذي ينتظر ألبومك وأعمالك الجديدة؟
أقول لهم استنوني، وإن شاء الله يكون فيه مفاجآت جميلة الفترة الجاية. أنا بتمنى دايمًا أكون عند حسن ظنهم، ومحبة الجمهور وثقتهم حاجة كبيرة جدًا بالنسبة لي وبتخليني دايمًا عايزة أقدم الأفضل.
وأخيرًا.. ماذا تتمنين في الفترة المقبلة؟
أتمنى أقدم أعمالًا أحلى وأفضل، وأفضل دايمًا أطور من نفسي وأجرب حاجات جديدة. الفنان عمره ما المفروض يقف عند خطوة معينة، لكن يفضل طول الوقت عنده حلم وخطوة جديدة بيسعى لها.. والأهم إن علاقته بالجمهور تفضل مبنية على الحب والثقة.
جوجل نيوز
واتس اب
جوجل نيوز
