شهيرة عن تصريحات ياسر جلال بشأن أجره: 10 مليون يا دوبك يكفي احتياجاته

علقت الفنانة الكبيرة شهيرة على تصريحات الفنان النائب ياسر جلال، عضو مجلس الشيوخ بشأن أجره السنوي الذي يتقاضاه من أعماله الدرامية، مشيرا أن أي فنان يحتاج المزيد من الأموال للإنفاق على نفسه.

وقالت شهيرة في مداخلة هاتفية عبر برنامج “90 دقيقة” المُذاع عبر قناة المحور مع الإعلامية بسمة وهبة: أوعوا تفتكروا إن كل الفنانيين بياخدوا ملايين، والناس مش عارفة حاجة، متعرفش إن إحنا علشان نظهر في أبهى صورة لهم ليهم محتاجين فلوس، فا يدوبك على ياسر جلال 10 مليون يقضوه على مدار السنة، لأنه كمان بيعلم ولاد بره، والمبلغ ده يا دوب يكفي احتياجاته، ما بيشوفوا الواحد يقولك ياه ده شهيرة عجزت، طب ما دي سنة الحياة، هما عايزيننا في أحلى صورة، ولا نعجز ولا نلبس وحش ولا نركب عربية نص كم، وكل ده محتاج فلوس.
 

تصريحات ياسر جلال 

وفي سياق متصل، كشف ياسر جلال منذ أسبوع عن أهمية تفعيل حق الأداء العلني بالنسبة للفنانيين.

وقال ياسر جلال خلال اجتماع نقابة المهن التمثيلية من أجل تفعيل القانون:   الراحلة ليلى مراد كان بتاخد 12 ألف جنيه زمان، والجنية الذهب كان وقتها بـ 96 قرش، ولو جيت حسبتها دلوقتي هتلاقيها 47 مليون  جنيه، وزمان كان بياخدوا أكتر من  دلوقتي بس الفكرة إن الفنان بيروح من أجره حوالي 40% مستقطع من أجر الفنان،

وأضاف: الفنان علشان يطلع بالشكل اللي بتشوفوه بيه ده هو وأولاده، لازم يصرف كتير من تعليم ومدارس، والفنان مش هيبهدل نفسه، علشان قدام الناس اللي بتحبه تشوفوا لابس كويس وقاعد في حتة كويسة، وراكب عربية كويسة، وأنا بعمل مسلسل واحد في السنة يا دوبك بيكفي المكان اللي ساكن فيه والصيانة والضرائب العقارية، ده غير ولادي ومصاريفهم، أنا بحب أعيش كويس وأعيشهم كويسين فالفلوس بتتصرف، وأي فنان قادر يعيش بيكون عامل بيزنس، وحق الأداء العلني مش بس مصر، ده في العالم كله.