داليا البحيري عن عملها مع الزعيم عادل إمام: اللي مع الكبير يكبر

تحدثت الفنانة داليا البحيري عن كواليس عملها مع الزعيم النجم عادل إمام من خلال مسلسل فلانتينو وفيلم السفارة في العمارة، معبرة عن فخرها بهذا التعاون.

وقالت داليا البحيري خلال لقائها ببرنامج "من ماسبيرو" المُذاع عبر شاشة القناة الأولى مع الإعلامية مريم أمين: محصلش أن اتعرض عليا دور تاني غير اللي قدمته، هو كان الدور التاني ولكن البطلة الأساسية قدام أستاذ عادل إمام، أنتي عارفة يعني إيه تقفي قدام أسد تمثلي، بس في مقولة إنجليزية بتقول لما تقفي جنب بوق الأسد هتاخدي كتير.

وأضافت: هو شخصية استثنائية علشان كده هو في الحتة اللي هو فيها، هو اللي كان محتضني وطول الوقت بيحاول يخفف الأمور، لأني كنت حاسة بمسؤولية رهيبة أني بطلة قدام أستاذ عادل إمام، الهرم الرابع.

وتابعت: كنت بحفظ دوري ومبسيبش أي مساحة للارتجال لأني كنت خايفة أضايقه أو أعطله بأي شكل من الأشكال، لأن أي لوكيشن فيه عادل إمام بيبقى كل واحد فيه عارف هو بيعمل إيه، وفعلًا أكتر عمل ارتاحت فيه كان فيلم السفارة في العمارة، كل حاجة فيه كانت ماشية بالساعة، فأنا كسبت كتير من وقفتي قدام أستاذ عادل إمام، لأن اللي مع الكبير بيكبر.

التعاون بين داليا البحيري وعادل إمام 

جدير بالذكر أن داليا البحيري تعاونت مع عادل إمام من خلال فيلم السفارة في العمارة، ومسلسل فلانتينو.