محمد الصاوي: عادل إمام كسر عندي رهبة الخوف في اللعب مع الكبار

كشف الفنان محمد الصاوي كواليس تعاونه مع الزعيم النجم عادل إمام لأول مرة من خلال فيلم “اللعب مع الكبار” الذي عُرض عام 1991. 

وقال محمد الصاوي خلال لقائه ببرنامج “الستات مايعرفوش يكدبوا” مع منى عبدالغني: كان بيلعب معايا شطرنج علشان يكسر عندي الرهبة والخوف، وقالي لو أنت هتبقى حلو أنا هبقى حلو، ولو أنت هتبقى وحش أنا هبقى وحش وده اللي طمني وقتها.

كما تحدث محمد الصاوي عن أصعب لحظة مر بيها في حياته، وقال: كان أصعب لحظة في حياتي لما ابني مات كان بعد أسبوعين من تخرجه من الكلية، وكان طالع التالت على الدفعة، وقعدت بعد وفاته تلات أيام مفيش دمعة نزلت منى.

وكشف محمد الصاوي عن تعاونه مع النجم أحمد العوضي في مسلسل علي كلاي، وقال: أنا اشتغلت مع أحمد العوضي قبل علي كلاي، وهو من الناس اللي تحبي تشتغلي معاهم وجدع، وبيشجع اللي بيشتغل معاه. 

وتحدث محمد الصاوي عن زوجته، وقال محمد الصاوي: وقفت جنبي وأنا في أشد الحاجة إني اشتغل ومكنش هاممها، وكان عندها ميزة إنها كانت بتحوش فلوس من ورايا علشان ينفعونا وقت الأزمات، ومكنتش بتشيلني هم حاجة، وكانت بتبين لي إن كل حاجة تمام ومفيش مشاكل، وفيه فترة كنت هتوقف فيها عن الشغل وهي شجعتني وقتها، وقالت لي كمل متوقفش. 

محمد الصاوي في علي كلاي

وشارك محمد الصاوي في مسلسل علي كلاي بطولة أحمد العوضي، والذي سبق عرضه بالموسم الرمضاني الماضي 2026.

وتدور أحداث مسلسل علي كلاي في إطار درامي حول شاب يدعى “علي” يلقبونه جيرانه بـ  «كلاي» بسبب براعته الاستثنائية في الملاكمة وقوة جأشه. بعيداً عن حلبة النزال، يعمل في تجارة قطع غيار السيارات، محاولا الموازنة بين خشونة عمله وطموحاته الرياضية، وبين ذلك يقع في العديد من المشكلات والعوائق.

ويضم فريق عمل مسلسل علي كلاي  نخبة من  النجوم منهم أحمد العوضي، ودرة، وعصام السقا، ومحمود البزاوي، ويارا السكري، وسينيتا خليفة، ومحمد ثروت، وطارق الدسوقي، وضياء عبدالخالق، وريم سامي، وسارة بركة، والمسلسل من تأليف محمود حمدان، وإنتاج تامر مرسي “شركة سينرجي للإنتاج الفني”، وإخراج محمد عبدالسلام.