معرفش وجهة نظرهم إيه هو أنا معيوب.. الفنان سيد صادق يكشف سر غيابه عن الساحة الفنية منذ 6 سنوات

كشف الفنان سيد صادق، سر غيابه عن الساحة الفنية، قائلا إنه لم يشارك في أي عمل فني منذ 6 سنوات، «متسألنيش إيه السبب، هل فيه فنان محترم يروح يقول للمخرجين أنا عاوز أمثل؟ لأ، هو الدور بينادي صحبه، وأنا يمكن مليش أدوار في الفترة دي، ومعرفش وجهة نظرهم إيه؟»، متابعا: «ولما قولت هل أنا معيوب عشان مش بشتغل؟ كنت في حالة حماس».

وعن موقف حدث له وأثر فيه، قال «صادق» في تصريحات تلفزيوينة: «كان ليا صديق، وبقى مخرج، واتصل بيا وعملت معاه عمل واتنين، والحمد لله ربنا وفقه ووفقني، وعرض عليا عمل وكان دور حلو ومساحة كويسة».

وتابع: «وبالفعل جهزت وبعد كام يوم سمعت إن الدور بيتصور بممثل تاني، وده موقف يؤكد لي إن مخبطش على باب حد، وأركز في شغلي اللي بيأكلني عيش وهي التجارة».

ووجه رسالة عتاب للمخرج، قائلا: «عيب اللي أنت عملته، دة أنا بابا، لو كنت ناسي أفكرك، الله يسامحه»، لافتا أنه كان يعمل في التجارة قبل دخوله لعالم الفن، «ده شغلي باكل منه عيش ومعيشني أنا وولادي وحياتي».

وكشف عن سبب اختيار المخرجين أدوار الشر للفنان سيد صادق، قائلا: «تكوين الشخص أو تضاريسه بتحدد له العمل، والحمد لله كنت عريض وعندي عضلات، وكان المخرجين في الأول شايفيني كده، وأنا لازم من أقبل الأدوار دي لحد ما وصلت وعملت أدوار إنسانية وطيبة، وربنا وفقني فيها».

وعن سر «الكيميا» بينه وبين الفنان الكبير عادل إمام، قال سيد صادق: «كان فيه قبول من عادل إمام، وأنا اشتغلت معاه والراجل استحسني، وشايفني واخد المسألة جد، وكان بيقولوه عني راح قالهم ده واد ابن بلد وواخد المسألة جد ومش بيهزر وبيسد».