عمرو أديب يدعم الإعلامي إبراهيم عيسى: أنا من المؤمنين بالمعراج

قال الإعلامي عمرو أديب: "أنا من المسلمين والمؤمنين بالمعراج وأنا من المتبعين للعلماء والفقهاء للشيخ الشعراوي والدكتور علي جمعة ولست مبتدعا أو مبتكرا ولست مفسرا، ومؤمن بما حدث في المعراج وقصة الصلوات الخمس مثل مئات الملايين من المسلمين".

وأضاف «أديب» خلال برنامج «الحكاية» المذاع علي قناة «إم بي سي مصر»، اليوم الأحد، "اللى انا مش فاهمه في الآونة الأخيرة انه كل يوم مطالبات أما بالقبض أو التحقيق أو الوقف أو القتل أو السحل لحد قال رأيه أو التكفير أو التشهير بحد قال رأيه، أنا مش بتكلم بس في الدين ولكن حتى في الرياضة، هي السوشيال ميديا موجودة علشان تخلى الاعلام حر ولا مرعوب، وقبل ما اطلع علي الشاشة بلاقي الوصايا العشر، انا مش بشتغل في الاعلام علشان اطبل في المتطبل ولا علشان اقول رأيي، ايه الإرهاب بتاع السوشيال ميديا دلوقتي؟".

وتابع: "اللى عنده مشكلة مع حد قال رأيه في الدين أو الرياضة قوله الصح ورد عليه، ولكن الشتيمة والاساءة ليه، طيب انتوا عايزين نعمل ايه، انا شغلتي أمسك السلك العريان مش اللى انت عايزه، وارد أغلط احنا مش انبياء ولا علماء ولا لينا الحق اننا نفتى ولكن من حقنا نقول رأينا".

وأكمل: "هو الهاشتاج كام تويتة أبوها 30 ألف تويتة، وممكن يبقى من 1500 الي 2000 تويتة، هو الهاشتاج هو الرأي العام بتاع مصر، ونصفهم ريتويت، والنصف الثاني عن اعلانات وشامبوهات وواحد تاني عايز يؤيد الاخوان وواحد تالت باعت رسالة لحبيبته، انتوا عايزين تقولولنا ان ده رأي مصر".

ولفت:"الغريب في الأمر ان اللوي والتكميم والتكتيف بقى بإيدينا، ودلوقتي يقولك اوقفوا فلان اقتلوه اسجنوه مش بتكلم بس علي ابراهيم عيسي ولكن حتى بتوع الرياضة، واللى مش فاهمه خالص هو ايه يعني ايه بتتفرج علي كل القنوات، يعني برة مصر الديمقراطيين بيتفرجوا علي قناة والجمهوريين بيتفرجوا علي قناة تانية، انما مفيش حد بيتفرج علي كل الناس ويقول رأيه فيهم كلهم زي مصر".