منة بدر تيسير لـ «بصراحة»: إصابتي بجلطة في المخ شائعة

كشفت الفنانة منة بدر تيسير حقيقة الأخبار المتداولة في بعض الصحف والمواقع عن إصابتها بجلطة في المخ.

 أنا كنت تعبانة تعب بعيد عن المخ خالص

وقالت منة بدر تيسير في تصريحات خاصة لـ «بصراحة»: أنا كنت تعبانة بقالي سنة، والحمد لله ربنا لطف بيا وبقيت كويسة، لكن ولا كتبت أنا تعبانة بإيه ولا تفاصيل المرض خالص، أنا كنت إن كان بيجيلي أيام مكنتش بقدر أخرج من البيت من كتر التعب، ولكن مكنتش بحب اتكلم، وأي حد مكنتش برد عليه بعتذر له لأني كنت تعبانة وكان غضب عني، لكن ألاقي الناس تقول إن جاتلي جلطة في المخ، أنا كنت تعبانة تعب بعيد عن المخ خالص، وأنا مبحبش أقول الحاجات السلبية ومش من شخصيتي كممثلة إني أقول تصريحات مثيرة للجدل، أو اطلع في أي برامج شو يعني انا مثلا بحب برنامج قعدة ستات جدا مع مروة صبري من باب أنه محاوره كويسة، لكني محبش أروح اتلكم في مواضيع مثيرة للجدل أو أمور شخصية لأن الفنان مينفعش يصدر طاقة سلبية للجمهور.

أنا قولت إني تعبانة لكن بعد ما خفيت وبقيت كويسة 
 

وأضافت: أنا قولت إني تعبانة لكن بعد ما خفيت وبقيت كويسة قولت إني كنت تعبانة، لكن وقت التعب كل الشهور اللي فاتت منزلتش أي حاجة عن تعبي، ولكن حياتي كانت ماشية إلى حد ضعيف، وأنا عمري ما هقول إني فيا حاجة وقت لما كنت تعبانة، ولما خفيت قولت إني خفيت وفي آخر مراحل العلاج ، لو كنت عاوز أقول تفاصيل في البوست قولت، وعمري ما قولت إني عندي جلطة، أنا كان هدفي أقول إن رحمة ربنا واسعة على الواحد، لإن الدكاترة مكانوش عارفين عندي إيه، وكنت باخد  أدوية مسكنات تخليني مش متفاعلة في الحياة أصلا، ووالدتي كانت يائسة من حالتي، ولو عايز أقول = حاجة مثيرة للجدل ها أقول وأنا تعبانة ، بس أنا بقول علشان أدي طاقة إيجابية مش علشان الناس تحطها مانشيت في المواقع من غير ما حتى حد يكلمني ويتأكد منه.

واختتمت: "لو كانوا تواصلوا مع حد من أهلي أو على الأقل مصدر من النقابة كانت إتاكد من الخبر قبل نشره، والدكتور أشرف زكي ، هو وإيهاب فهمي كانوا أكتر ناس متابعنى  وعارفين حالتي كويس جدا، ولو كانوا تواصلوا معاهم مكنش ده حصل، إني أصحى ألاقي الناس بتقول إن عندي جلطة وأنا بصور مسلسلي الجديد، وروحت اعمل عمرة.

مرض منة بدر تيسير 

وانتشرت في الساعات الأخيرة أنباء عن إصابة منة بدر تيسير بجلطة في المخ، وسرعان ما كذبت هذه الشائعة من خلال منشور كتبته عبر صفحتها الرسمية بموقع “انستجرام”، والذي جاء كالتالي: خبر كاذب وغير حقيقي، يا ريت السادة الصحفيين تحري الدقة، عيب جدا ممكن تتأكدوا من صاحب الشأن من آداب المهنة، أقل حق من حقوقي.