كارولين عزمي توجه رسالة للفتيات: أوعي تسكتي ومتخافيش احنا في بلد قانون

نشرتالفنانة الشابة كارولين عزمي، منذ قليل، منشورًا عبر خاصية “استوريز” على موقع التواصل الاجتماعي لتبادل الصور والفيديوهات “إنستجرام”.

وقالت عزمي: “الحمدلله حقي رجعلي.. وعايزة أشكر وزارة الداخلية والنيابة العامة على سرعة الاستجابة.. شكرًا إنكم مسكتوا الشخص ده في نفس اليوم.. وأحب أقول لكل البنات أي موقف تتعرضي له أوعي تسكتي ومتخافيش وحقك هيجيلك احنا في بلد قانون مع احترامي لزوجته وأولاده بس أنا مش هتنازل.. وأتمنى يكون درس ليه وعبرة لغيره".

يذكر أن الفنانة كارولين عزمي كشفت، أمس، عن تعرضها للتحرش داخل سيارتها، وقالت عبر إنستجرام من خلال مقطع فيديو: "مساء الخير، أنا اللي يعرفنى أو متابعنى عارف أني شخص مالوش فى المشاكل، ولا عمري شاركت مشكله تخصنى سوشيال ميديا".

وأضافت: "النهاردة كنت فى عربيتي وجنبي عربية فيها واحد كسر عليا كل اللي عملته إنى بصيت له وبصيت قدامي، فلقيته بيكرر نفس الحركة تانى باستظراف، روحت طلعت الموبايل وعملت نفسي بصور عشان اخوفه واخليه يبطل يضايقنى، اتفاجأت وهو بيقول لى بتصوريني يا بنت لفظ خادش".

وذكرت: "ساعتها اتخضيت وبدأت أصور بجد وأنتم هتشوفوا في الفيديو الحركات اللي بإيده والشتايم، وبدأ يقول لي تعالي ورايا، والحقيقة إني مش عارفة أروح وراه فين أو كان عايز يعمل ايه، ولأني اتوترت وخفت ساعتها مقدرتش اصور 1% من اللي عمله الشخص دا".

وتابعت كارولين عزمي: "أنا اتشمت واتهنت واتشمت بأهلي بأقذر الشتايم النهاردة من حد معرفوش ولا عملت له حاجة، ولا فتحت بوقي لمجرد إنه شخص مريض!، أكيد الشخص دا أذى بنات كتير لإنه تقريبا متعود على الحركات دى، ومتعود يخوفهم ومش همه حتى إنه يتصور ويتفضح، أنا عايزة حقي يرجع لي".

من ناحية أخرى، تنتظر كارولين عزمي حاليا، عرض مسلسل أبو العروسة الجزء الثالث يوم 29 من يناير الجاري، بطولة الفنانة سوسن بدر، والفنان سيد رجب، ولاء الشريف، محمد عادل، كارولين عزمي، مدحت صالح، نيرمين الفقي، ونجوم جدد على الجزء الثالث من المسلسل، منهم: نور محمود، وفاء صادق، وآخرون.