أحمد موسى يفتح النار على مسؤولي الكرة المصرية بعد الخروج من كأس العرب

انتهت مباراة منتخب مصر و الأردن بثلاثية نظيفة في كأس العرب ،ويخرج على إثر النتيجة من مجموعات البطولة .

أحمد موسى يهاجم المسؤولين 

 وهاجم الإعلامي أحمد موسى آداء المنتخب قائلا :" اللي حصل يخليني أسأل إيه اللي بيحصل 

إحنا روحنا بمنتخب تعبان ومكسّحين شوية، ومع كامل احترامي ليهم، مفيش كورة ولا منتخب ولا مدرب ولا لعيبة ولا منظومة"
وتابع :"من أول ماتش قلت لازم المنتخب ده يرجع، ويوم ماتش الإمارات نفس الكلام ، المنتخب الأردني اللي كسبنا هو المنتخب التاني، ولو كان المنتخب الأول لعب كانوا كسبونا 6 أو 7 ،من رحمة ربنا إنهم ملعبوش بالأول"
وأكد أن :" منتخب الأردن قوي وهيعمل حاجة في كأس العالم لأن عندهم منظومة ومفيش مجاملات ،هنا في مصر مش عارف مين بيختار اللعيبة!

وتسائل :" فين الشحات وناصر ماهر وطاهر؟ بتاخد مين معاك؟ مين بيختار؟"
وتابع :"بيكلمونا عن سمعة الرياضة الناس مالهاش علاقة بمنتخب أول ولا تاني، شوف منتخبات الناشئين: أحمد الكاس وأسامة نبيه وحلمي طولان كله فاشل"

وتابع :" عندنا صلاح ومرموش ومصطفى محمد ولاعب أو اتنين ، بلد فيها 100 مليون ومش قادرين نطلع لعيبة؟
 إيه أهمية الدوري؟ ليه موقفتوش الدوري؟"

تصريحات حلمي طولان

 وقال :"أنا اللي في مرمى النيران حالياً، لكن اللي يتحمل مسئوليه كل اللي حصل ده والإهانة دي، هو الشخص اللي رفض يأجل مباريات الدوري المصري ورفض دعم المنتخب المشارك في كأس العرب"

وتابع :" أنا كلفت من قبل اتحاد الكرة المصري بالمهمة دي من ثلاث شهور لعمل قائمة ومنتخب جديد، جيت اروح البطولة قالولي لا إحنا نأجل للأهلي نأجل للزمالك نأجل للمصري ماتشات لكن بيراميدز لأ"

واختتم :" أنا في 7 لعيبه راحوا مني بسبب رفض تأجيل مباريات الدوري ،كل المنتخبات اللي شاركت، الدوري عندهم وقف إلا بلدنا مصر .. اسألوا ليه؟"

لتنتهي المباراة بفوز النشامة وتأهلهم لدور الثامنية وإقصاء منتخب مصر من دور المجموعات بدون أي انتصار وبنقطتين فقط .