محمود حسن تريزيجيه: لست مدمن شهرة.. ومنتخب مصر الاختيار الأول لي دائما.. وهذه المرة الأولى التي أرى فيها دموع محمد صلاح

كشف محمود حسن تريزيجيه لاعب الأهلي، عن موقفه من التحدث في وسائل الإعلام، ومشواره مع منتخب مصر.

تصريحات محمود حسن تريزيجيه

قال تريزيجيه: “أنا مش مدمن شهرة، لأن أنا مؤمن إن المولد اللي لاعب الكورة فيه، هيتفض ولازم لعيبة الكورة تقتنع بالكلام دا، لأن في لعيبة كورة بتلعب فاكرة إن الدخل اللي بيدخلها هيفضل يجيلهم لحد ما يموت، وإن هيفضل طول حياته الناس تفضل تتصور معاه وهو ماشي في الشارع وإنك النجم”.

وتابع عبر برنامج الكورة مع فايق: “أنت هيجي وقتك وغيرك هيطلع ياخد مكانك، فخليك على قدر ما تقدر تراعي ربنا في أكل عيشك، لحد ما الفترة دي تنتهي وأنت راضي عن نفسك”.

وأكد: “طول فترة إحترافي لحد النهاردة، بستني اسمي زي اسم أي لاعب للانضمام لمنتخب مصر، الواحد بيستني أي ماتش للمنتخب ودي رسمي معسكر، ومنتخب بلدي بالنسبة لي حياتي”.

وواصل: “النشيد لما بيتردد دا إحساس كبير، في لاعيبة بتفضل إنها تاخد إجازة ومتروحش المنتخب، ولكن أعرف إن دا بيكون طريقة غلط في الكورة”.

محمود حسن تريزيجيه مع إبراهيم فايق

وزاد: “المنتخب رقم 1 عندي وتشيرت بلدي رقم واحد، بطولة الأمم الإفريقية 2021، كانت حياة أو موت بالنسبة ليا، لأن كنت لسا راجع من صليبي، وكنت واخد أوامر من أستون فيلا، إني لو حصل ليا حاجه مش هيعالجوني، وقالولي الأحسن تقعد معانا علشان تحافظ على مستقبك”. 

وأوضح: “قولتلهم لو آخر بطولة هروح المنتخب، وأنا خدت مخاطرة كبيرة في حياتي في الخطوة دي، ولكن بلدي أهم من أي حاجة، عمري ما اتكلمت في النقطة لأني بتعامل في حياتي مع ربنا، ودا حق بلدي عليا دا في ناس بتموت علشان خاطر بلدنا وعلشان تحافظ علينا”.

وأتم: “محمد صلاح بعد ماتش السنغال قالي في أوضة اللبس، أنا مش مصدق إننا مش رايحين كأس العالم وهعتزل دولي وكان بيعيط، وأول مرة أشوفه بيعيط، وأول ما اللعيبة شافته بيعيط إنهارت جدا”.