عمر عصر: محمود أشرف رفض مصافحتي.. وكنت مصدوم من رد فعله

تحدث عمر عصر لاعب منتخب مصر لتنس الطاولة، عن أسباب الأزمة الأخيرة مع زميله في المنتخب محمود أشرف.

تصريحات عمر عصر

قال عمر عصر: “إمبارح اتكلمت مع كابتن أشرف رئيس اتحاد التنس، وقولتله إن عندي مزق، النهاردة الكباتن المسئولة عن اللعب قالولي إلعب حتى لو ماتش واحد، واحنا أساسا مفيش معانا دكتور ولا مدرب لياقة”.

وتابع عبر برنامج الكورة مع فايق: “النهاردة واحنا بنقرأ الفاتحة قبل الماتش، محمود أشرف مجاش يقرأ الفاتحة معانا وقاعد حاطط رجل على رجل”.

وأضاف: “تاني حاجة الفريق كله بيشجعني بحماس، وهو حاطط رجل على رجل وماسك التليفون، وده مش طبيعي”.

وأكمل: “وأنا بسلم على كل لاعب والجهاز، و بمد إيدي أسلم عليه لقيته قام ومشي واتصدمت برد فعله”.

واختتم: “نزلت ألعب الماتش لقيته رجع وحاطط رجل على رجل، قولتلهم مش هينفع نلعب كدا وبعدها قولت مش هلعب ده قليل الأدب”.

أزمة عمر عصر مع محمود أشرف

وفي نفس السياق قال رئيس اتحاد تنس الطاولة، خلال مداخلة هاتفية مع الإعلامي إبراهيم فايق في برنامج القهوة على قناة MBC مصر 2: "اللي حصل بين اللاعبين أنا مستغربه جدًا، ومستغرب إن محمود ما سلّمش على عمر، وبرضو مستغرب من رد فعل عمر، ومكنش ينفع الموضوع يكبر بالشكل ده".

وأضاف: "محمود هو ابني، لكن ده مش معناه إنه معفي من العقوبة، واللي غلط لازم يتحاسب، سواء هو أو غيره، والعقوبات هتتطبق حتى لو على محمود نفسه".

وأوضح رئيس الاتحاد أن الفيديو المنتشر على مواقع التواصل الاجتماعي لا يُظهر اللقطة الأولى من الواقعة، موضحًا أن البداية كانت برفض محمود السلام على زميله عمر عصر، مما تسبب في توتر العلاقة بينهما.

وأشار إلى أنه طلب من اللاعب محمود أشرف عدم الصعود إلى المنصة خلال اليوم التالي، تجنبًا لأي ردود فعل غير متوقعة من الجماهير أو زملائه.