كلامنا هو اللي مشي.. محمد عطية يعلق على وقف إطلاق النار في غزة

علق الفنان محمد عطية على وقف إطلاق النار في غزة، وذلك من خلال منشور له عبر حسابه الشخصي بموقع التواصل الاجتماعي فيسبوك.

وكتب محمد عطية: اللي حصل ده مش سهل خالص يا جماعة .. العالم كله كان بيضغط عليك عشان تنفذ خطة التهجير .. مسخرين كل أدواتهم عشان يشوهوا صورتك.

وأضاف: تخوين و شتيمة ليل و نهار.. كل اللي حواليك باعوك ووافقوا على الخطة و تصفية القضية و انت حرفيا كنت لوحدك  .. و في النهاية كلامك هو اللي مشي .. و اوعى تفتكر ان في حاجة بتحصل اعتباطا .. ميعاد الاجتماع للمفاوضات .. جايبهم عندك و البلد كلها بتحتفل بالانتصار عليهم .. ظهور  خليل الحية في عز الضهر على بعد كام كيلو منهم بعد التهديد ان هيتم اغتيالهم في اي حتة  … و مش بس ظهر عادي كده لا ده بيعمل لقاء تليفزيوني.

وواصل: اللي هو أنا آهو  لو دكر اعمل حاجة … كل دي حاجات مش سهلة .. الطيارتين الحربيتين اللي طاروا في شرم رافعين علم مصر و فلسطين و الوفد لسه موجود .. استعراض فعلي للسيادة و القوة  و مافيش حد في المنطقة يجرؤ يعمل ده غيرك .. رفض دعوة ترامب مرتين و بعدين نجيبه عندنا .. كل ده يخليك تعرف ان في النهاية انت الحقيقة الوحيدة في المنطقة .. ماتسمحش لحد يزايد عليك بعد كده اللي حصل ده لا هو شعارات و لا تنمية وطنية .. اللي حصل ده فعل و حاضر شفناه كلنا بعنينا  .. الموضوع بكل اختصار يا سادة ان مصر بلد عظيمة .. عظيمة جدا بس احنا ساعات بننسى ده.