وليد صلاح الدين: الأهلي يمتلك أقوى فريق في إفريقيا.. وهذه رسالتي إلى جماهير الأحمر

قدم وليد صلاح الدين مدير الكرة بالنادي الأهلي، التهنئة إلى جماهير الأهلي، بعد الفوز اليوم على الزمالك في القمة رقم 131.

تصريحات وليد صلاح الدين

قال وليد صلاح الدين: “مبروك لكل جمهور الأهلي ومجلس الإدارة والجهاز الفني واللاعبين كلهم رجالة، كنا في ظروف صعبة ومحتاجين الفوز”.

وتابع عبر قناة أون سبورت: “الكل كان بيقول مش هنشوف ماتش حلو، لكن اليوم قدمنا مستوى كبير يليق بالكرة المصرية”.

وأكمل: “مباراة كان فيها فرص كثيرة وكان ممكن تطلع باهداف أكثر، اظن كل الجمهور استمتع، مبروك لكل الرجالة النهاردة، ومنتظرين كل اللاعبين الغائبين إمام وزيزو وداري وشكري وأفشة، وكل المصابين مستنيهم”.

وأضاف: “بقول لجمهور الأهلي، فرقة الأهلي أقوى فرقة في إفريقيا، عايزين نهدى ونثق في اللاعبين والجهاز الفني واحنا إن شاء الله في الطريق الصحيح، ومتصدقوش 90% من الأخبار المغلوطة اللي بتكتب”.

وزاد: “أتمنى جمهور الأهلي الحقيقي، ياخد باله، عندنا مصادر رسمية، وأنا أي حاجة بطلع وأوضح، ما تصدقوش الأخبار الكاذبة بنسبة 90%، مش عايز أقول الأسماء والمواقع والأشخاص”.

وليد صلاح الدين مدير الكرة بالنادي الأهلي

وأشار: “أنا شايف إن احنا أول 10 دقايق مكناش كويسين، لكن بعد كدا امتلكنا الملعب والزمالك أول 5 دقايق راح بكرتين لعدي وناصر، والمباراة بعد ذلك كانت سجال”.

وذكر: “حتى مع احتساب ركلة جزاء للزمالك إحنا كنا أفضل، والمباراة كانت من جانب واحد، وضيعنا فرص كثيرة، ولكن الحمد لله على المكسب، ومن سمة الفرق الكبيرة إنها تقدر ترجع في المباريات القوية، حتى مع الغيابات احنا فرقة جامدة”.

وأردف: “بشكر كل اللاعبين اللي شاركت، من أول حسين وعبد القادر وعمر وديانج، مبروك لكل جمهور الأهلي، والأهلي لما بيقع له ألف قومة”. 

وأتم: “ملف المدرب الأجنبي على طاولة الكابتن الخطيب ولجنة التخطيط لسه مفيش حاجة أكيدة، وفي سير ذاتية بتعرض وبنحاول نتناقش وممكن حد يعتذر وفي حد بيطلب رقم مبالغ فيه، وفي حد مش عايز يجي المنطقة العربية، بيكون في أسباب مختلفة، ولكن في النهاية الأهلي قادر على استقدام مدرب أجنبي قوي، وعلينا أن نشكر الكابتن عماد النحاس”.