مهيب عبد الهادي: ما يحدث في الأهلي صعب على جماهير.. وتحية كبيرة للاعبي الزمالك

تحدث الإعلامي مهيب عبد الهادي، عن آخر المستجدات داخل جدران النادي الأهلي، والأزمات التي تحيط بالفريق الأول لكرة القدم.

تصريحات مهيب عبد الهادي

قال مهيب عبد الهادي: “لا صوت يعلو فوق صوت اللي بيحصل في الأهلي، سبحان مغير الأحوال من حال إلى حال من فلوس بالمليارات ومشاركة في كأس العالم وإعلانات ولعيبة أسماء كبيرة جدا، والناس كلها قالت الأهلي هياكل الأخضر واليابس، لكنبيحصل حاجات حاليا كلها غلط ومش مظبوطة”.

وتابع عبر برنامج اللعيب: “كل اللي بيحصل ده بسبب حاجات قديمة لم تنتبه إليها إدارة الأهلي، عملت حاجات كتيرة كويسه لكن في حاجات كانت غلط، زي المدير الفني وفي حاجات مكنش فيها حسم”.

وأكمل: “اللي بيحصل في الأهلي صعب على جماهيره، لما تيجي بالاسكواد ده تاخد 6 نقاط من أصل 15 نقطة ده صعب جدا، ده الأهلي متساوي مع الجونة وفرق لسه صاعدة”.

تراجع نتائج وأداء الأهلي

وأضاف: “لعيبة الأهلي قعدت مع بعض في الكواليس وللأسف شايفة الموضوع عادي، وبتقولك عادي الفرق بينا وبين الزمالك كام هنجييهم وعندنا ماتش معاهم، ده خبر من الكواليس لكن أنا بقول ده مش الأهلي”.

وزاد: “بقول للعيبة الأهلي مفروض تحمدوا ربنا أنكم بتلعبوا في الأهلي، وتسجد شكر أنك بتلعب في الأهلي، لكن تقعد تتكلم في عقود وتقولي أجدد عقدي بكام وبتاع على إيه، هو أنت كنت بتاخد كام يعني وهي فين النتائج اللي حققتها وأنتوا في حاجه غلط”. 

وذكر: “صفوا النية وإلعبوا كورة مش كل حاجة فلوس، الأهلي بيدي فلوسه أول بأول وببلتزم بعقوده”.

وأتم: “لا ده كده تحية للاعبي الزمالك اللي بيلعبوا ويأدوا ويكسبوا وهما مخدوش فلوسهم، والأهلي مش عايز أقول أنه دلع لعيبته، بس هو وفر ليهم كل حاجة ومفيش مردود للحاجات اللي اتوفرت”.