محسن صالح: ريبيرو كان أقل من مستوى الأهلي.. ولابد من إحداث تغيير في إدارة الكرة أيضا

تحدث كابتن محسن صالح رئيس لجنة التخطيط السابق بالنادي الأهلي، عن المدير الفني الأنسب للقلعة الحمراء، خلال الفترة القادمة.

تصريحات محسن صالح

قال محسن صالح: “أنا اتسألت أول ما ريبيرو جه، قولت كنت أتمنى أن لا يتعاقد الأهلي مع مدرب يعمل في قارة افريقيا، لأن كلهم بيبقوا ليفل 5 أو 6، كنت أتمنى نتعاقد مع مدرب ليفل 2 أو 3 ويليق بإسم الأهلي والبطولات اللي بيشارك فيها”.

وتابع عبر برنامج الكورة مع فايق: “موسيماني ليفل 5 أو 6، احنا بعد جوزيه ماشوفناش مدرب لائق، موسيماني كان اختيار سئ ولا يليق بالأهلي، وكولر ما أقنعنيش، وحسام البدري ومحمد يوسف وعبد العزيز عبد الشافي جابوا بطولات زي موسيماني”.

وأكمل: “الأهلي في حاجة لقلب دفاع أجنبي سوبر، ولازم يفكروا في بيع أشرف داري لكثرة إصاباته، ولازم باك شمال ضروري ورأس حربة واستبعاد 5 عناصر بدون ذكر أسماء”.

وواصل: “زي ما حصل تغيير في الجهاز الفني للأهلي لازم يحصل تغيير في إدارة الكرة، لازم ييجي واحد يقدر يجمع النجوم دول كلهم ويحفز المجموعة ويعلي الطموحات، ويحط ميزان والكل يشتغل في مصلحة الفريق”.

المدير الفني الجديد للنادي الأهلي

وأشار: “جوزيه جوميز اختيار مناسب للأهلي لأنه يملك خبرة في الكرة المصرية، بس هو مفيش غيره في سوق العالم كله يعني”.

وذكر: “لو مفيش أسماء مدربين مطروحة، يبقى فيه مشكلة في الاسكاوتنج، لأنه المفروض في أي لحظة يطلعلك أسامي، عنده كل الداتا موجودة، أمال شغلهم ايه”.

وأضاف: “أنا فاكر في مرة كان هاني رمزي ماسك الاسكاوتنج، وكان عندي إحساس إن كولر مش هيكمل، قولتله زود شغلك يا هاني واشتغل كويس، قالي أنا جاهز يا كابتن، وأنا جاهز دي معناها انه معاه داتا لـ 30 او 40 مدرب مثلاً”.

وأتم محسن صالح حديثه: “المفروض إن كل نادي يبقى عنده كده، أمال المدير الرياضي ده وظيفته ايه، ما هي دي من ضمن وظايف المدير الرياضي، لما نادي يبقى في أزمة يطلع الشنطة يطلع 20 ولا 30 سيرة ذاتية يختار بينهم”.