الزمالك هرم في مصر.. رحاب أبو رجيلة يتحدث عن أزمة سحب أرض 6 أكتوبر

أعرب رحاب أبو رجيلة عضو مجلس إدارة نادي الزمالك السابق، عن حزنه لما تتعرض له القلعة البيضاء، من أزمات متتالية خلال السنوات الأخيرة.

تصريحات رحاب أبو رجيلة

قال رحاب أبو رجيلة: “مش عايز أكون بتكلم في نفس الكلام عن المواضيع القانونية فيما يخص أرض اكتوبر لان الزمالك في حاليا ناس قانون شغاله على الموضوع مع مجلس الإدارة”.

وتابع عبر راديو صوت الزمالك: “أنا حابب أتكلم في نقطة مهمة جدا أنت عندك كيان كبير اسمه الزمالك عنده أزمة مالية خانقة بقاله فترات طويله ومعندوش ملجأ للخروج من الأزمات دي غير ببناء الفرع وأرض اكتوبر اللي ممكن تطلعه إلى النور أو تدخله النفق المظلم إلى ما لا نهاية”.

وأكمل: “لازم الناس المسؤولة تبقى فاهمه أن الموضوع مش أرض وسعت ولا ضاقت ولا الزمالك بيعمل فروع ولا غيره، احنا بنبص للمشروع ده إنه المنفذ الوحيد اللي يوقف الزمالك على رجليه بعد المشاكل اللي اتعرض ليها سنوات”.

وأضاف: “وده اللي هيساعده في سداد الديون ليه سابقة والنهوض بالنادي ويسري الرياضة المصرية والمنافسة والأرض دي الملجأ لكده ولازم الناس تبقى فاهمه النقطة دي كويس”.

رحاب أبو رجيلة

وزاد: “ده مشروع هيحقق دخل لنادي الزمالك ويقدر يخليه يقوم على رجليه ويقدر يقوم بدوره الرياضي وان الناس لازم تقف مع الزمالك علشان تخرجه من الأزمة اللي فيه دي”.

وواصل: “انت مطلوب منك كنادي الزمالك تصرف على 26 لعبه في مختلف الأعمار والألعاب مش كرة القدم بس، والله انا كنت راجل عضو مجلس إدارة في الزمالك قبل كده وكان سهل جدا اقول انا هلغي 20 لعبه وهكتفي بخمس أو 6 العاب”.

وذكر: “لكن هل ده هيفيد الرياضة المصرية؟ أنا النهارده بروح اعمل مراكز شباب وسيتي كلوب وغيرها علشان اوسع القاعدة الرياضية بتاعتي وهي حاجات جميله ومحترمه وكلنا مبسوطين منها”.

وأتم حديثه: “طيب لما يبقى عندك هرم في مصر زي الزمالك عنده القاعدة دي كلها مش هل الدور الحفاظ عليها، الزمالك منشأة غير هادفة للربح اصلا، كل الأمور دي للصرف على النادي والأعضاء، عايزين نحافظ على الإرث بتاعنا مش على مستوى مصر ده على مستوى العالم”.