لايف موقع بصراحة| «جسمه رافض المية»..والدة الصغير حسين تستغيث لعلاجه وإنقاذ حياته : ساعدوني وانقذوا ابني

"نفسي أشرب زي إخواتي".. بهذه الكلمات المؤثرة وجهت والدة الطفل حسين، البالغ من العمر 9 سنوات، نداءً إنسانيًا عاجلًا عبر مقطع فيديو لموقع "بصراحة"، تستغيث فيه لإنقاذ نجلها الذي يُعاني من مرض نادر يجعل جسده يرفض استقبال الماء، ما يسبب له مضاعفات صحية خطيرة قد تُهدد حياته.

وقالت والدة حسين في استغاثتها: “ابني بيشرب في حياته اليومية بالفنجان وبالقطنة، ومش بيشرب مية من الحنفية خالص، جسمه رافض الميه، ولو شرب ممكن كليته تتأذي، بياخد أكتر من 17 برشامة في اليوم، وكل ده علشان جسمه يقدر يستحمل”.

وتابعت الأم: "كل ما يشوف إخواته بيشربوا ميه، بيقعد يعيط، ويقولي: يا ماما أنا نفسي أشرب زيهم، مرة سابني في المستشفى، وجري على الأرض وحاول يلحس البلاط من كتر ما هو مشتاق يشرب ميه، ابني بيتعذب، وحياته كلها وجع وتعب وحرمان من أبسط حق”.

والدة حسين: "ابني محتاج7 حقن يوميًا وسعر الحقنة 176 ألف جنيه"

و أضافت والدة حسين لـ "بصراحة": "ابني محتاج 7 حقن كل يوم، والحقنة الواحدة بـ176 ألف جنيه، الحقن دي بتغنيه عن حاجات كتير زي غسيل الكلى". 

وتابعت : “إحنا ناس على قد حالنا ومش قادرين نكمل، المستشفى كل يوم بتطلب مننا العلاج، ولو ما جبناهوش، بيقولوا المسؤولية علينا، أنا بعمل فيديوهات كل يوم علشان أوصل صوتي، لكن مفيش أي استجابة”.

والدة حسين: “مش قادرة ألف ورا الورق احنا ناس على قدنا ”

قالت والدة حسين: “رحت المستشفى أطلع تقرير طبي، قالولي روحي الأول للتضامن، ولما رحت التضامن قالولي جهزي اوراق كتير و ارجعي للمستشفى وهاتي ورق باسمك، أنا مش عارفة أعمل إيه، كل يوم طلبات، وأنا مش قادرة ألف وراهم، وابني بيتألم كل دقيقة.

وتابعت والدة حسين: “ ابني قالي يا ماما أنا تعبت، نفسي ألعب كورة، ونفسي أشرب زي إخواتي، ابني مش بيطلب حاجة كبيرة، بس مش قادر حتى يحقق أبسط أحلامه”.

والدة حسين: “أنقذوا ابني عايزة ابني يعيش مرتاح”

واختتمت والدة حسين استغاثتها قائلة: “ابني محتاج تدخل عاجل من الجهات المختصة علشان يتعالج ويعيش زي باقي الأطفال، أنا بطالب المسؤولين بالتحرك فورًا، وبناشد أصحاب القلوب الرحيمة يساعدوني في إنقاذ ابني، نفسي الدنيا كلها تقف جنبي، نفسي ابني يعيش، مش عايزة غير إنه يخف ويعيش زيه زي أي طفل”.