شوبير يهاجم جماهير الزمالك: «اللي حصل في المدرجات غلط الغلط وأنا مش هسكت»

وجه الإعلامي أحمد شوبير، حارس مرمى الأهلي ومنتخب مصر السابق، انتقادات لاذعة لبعض جماهير نادي الزمالك، بعد التجاوزات التي صدرت خلال مباراة الفريق أمام سيراميكا كليوباترا، والتي طالت نجم الأهلي أحمد سيد "زيزو".

وقال شوبير، خلال تصريحاته الإذاعية صباح الأحد: "اسمعوا الكلام ده كويس، لأن الموقف ده مش جديد عليّ، في 2007 قلت إننا داخلين على طريق غلط بسبب سلوك بعض الجماهير، وحذرت وقتها من تطور الأمور، لكن للأسف ماحدش سمع."

وتابع:"أنا لعبت كرة من سنة 1975 في زيوت طنطا، وفي 1977 رحت الأهلي، لكن في شغلي عمري ما انحزت لا لأهلي ولا زمالك، أنا برضي ضميري وربنا فقط."

وأشار شوبير إلى أنه كان من أوائل من انتقدوا تصرفات روابط الألتراس في بدايتها، مضيفًا: "لما ظهرت روابط زي الوايت نايتس والألتراس وبدأت الهتافات الغريبة، قلت بالحرف (هتفوقوا على دم وناس هتموت)، لكن ردوا عليّ باستهزاء، وبدأت الهتافات ضدي، لكني متمسك بموقفي."

وأعرب شوبير عن حزنه الشديد لما وصلت إليه الأمور، مستشهدًا بـحادث بورسعيد الذي وصفه بأنه لحظة مؤلمة كشفت خطورة الانفلات الجماهيري، مشيرًا إلى أن عودة الجماهير للمدرجات جاءت بعد مجهودات كبيرة وضوابط أمنية، لكن ما يحدث حاليًا يُنذر بالخطر.

وأضاف: "أنا مالي اللاعب راح الأهلي أو الترسانة، دي حرية شخصية. رد في الملعب، قول أنا بكسب من غيره، لكن اللي حصل في مباراة الزمالك وسيراميكا لا يجوز السكوت عليه، ده مش تشجيع، ده سلوك مرفوض."

ووجّه شوبير رسالة قوية لإدارة الزمالك: "غرامة 100 ألف جنيه مش هتفرق مع الجماهير، لكن الموقف القوي من النادي هو اللي هيأثر، لازم يكون فيه وقفة حقيقية من الإدارة لضبط السلوك العام."

واختتم حديثه مؤكدًا أن الحل واضح: "الملعب فيه كاميرات، واللي يخطئ لازم يُحاسب، مفيش مجاملة، ولازم نحافظ على الرياضة ونمنع الفوضى من العودة للمدرجات."