مدير أعمال أحمد عامر لـ"بصراحة": "مات موتة طبيعية.. واللي بيتقال شائعات مغرضة للتريند"

نفى مدير أعمال الفنان الراحل أحمد عامر كل ما تم تداوله من شائعات حول ظروف وفاة الفنان الشعبي الشاب، مؤكدًا أن الراحل "مات موتة طبيعية جدًا"، ولا صحة لما يروج له البعض من روايات مثيرة للجدل.

وقال مدير أعماله في تصريح خاص لموقع “بصراحة” الإخباري: "ادعوا له بالرحمة.. أحمد مكانش تعبان، كان كويس جدًا، وجاله بس برد في معدته وارتجاع خفيف، كل الكلام التاني اللي بيتقال مش حقيقي، وكلام فاضي بيتقال علشان الناس تطلع تريند".

وأضاف: “إحنا كنا في فرح بنبروط وراجعين القاهرة علشان عندنا شغل، وفجأة حس بتعب وإحنا في الطريق، فقررنا نروح المستشفى.. بس ربنا اختاره في اللحظة دي ربنا يرحمه”.

حقيقة وجود خدوش على جسد أحمد عامر

وأكد مدير أعمال عامر أن الحديث عن وجود إصابات أو آثار عنف على جسده كذب وافتراء، قائلاً: “مافيش خرابيش ولا خدوش في إيده زي ما بيقولوا، ومش عارف الناس بتجيب الكلام ده منين، كل ده علشان يشدوا الانتباه ويعملوا شو على حساب موت إنسان”.

هل كان ينوي أحمد عامر الاعتزال؟

وعن الشائعات التي تحدثت عن نية أحمد عامر الاعتزال أو شعوره بالحزن، أوضح: “مكانش ناوي يعتزل الفن ولا قال أي حاجة من دي بالعكس، كان بيخطط لحفلات جديدة واغاني، هو بس كان موصي إنه لو توفي في أي لحظة يتحذف كل أغانيه، علشان كده قفلت كل حساباته على مواقع التواصل الاجتماعي”.

جنازة أحمد عامر دليل على محبة الناس له

وختم مدير أعماله حديثه قائلًا: “محبة الناس لـ أحمد عامر بانت في جنازته، الناس جت من آخر البلاد من الصبح، ده دليل على حب الناس ليه، عمره ما أذى حد ولا عمل حاجة وحشة مع حد، وكان محبوب في الوسط وبين الناس”.

وفاة أحمد عامر

ويذكر أن الفنان أحمد عامر رحل عن عالمنا صباح اليوم الأربعاء 2 يوليو، عن عمر يناهز 37 عامًا، وشيعت جنازته اليوم من مدينة سمنوط بمحافظة الغربية، وسط حضور كبير من نجوم الغناء الشعبي وجمهوره من مختلف المحافظات.