سيدة أمام محكمة الأسرة: «بعتلي طلب طاعة عشان تراب الشباك»

«ما صدقتش إن الموضوع وصل لكده، خناقة على نظافة البيت تتحول لإنذار طاعة«، بهذه الكلمات استهلت ربة منزل تبلغ من العمر 29 عامًا، حديثها من داخل محكمة الأسرة، حيث جاءت للرد على إنذار طاعة أرسله لها زوجها بعد أن تركت منزل الزوجية إثر مشادة بسيطة.

وقالت الزوجة : «اتجوزنا من 3 سنين، وكل حاجة ماشية بالعافية، بس أنا كنت مستحملة علشان البيت، آخرها إنه اتخانق معايا علشان نسيت أمسح تراب الشباك، وقاللي: انتي ست مش نظيفة».

وأضافت: «الإهانة كانت أكبر من أي حاجة، أنا طول الوقت بنضف ومهتمة بكل حاجة، بس المرة دي الكلام كان جارح، سبني وخرج واتأخر برة، ولما رجع ماكلمنيش، وأنا قررت أروح بيت أهلي شوية لحد ما يهدأ».

لكن ما لم تتوقعه السيدة أن زوجها لم يحاول الاتصال أو الاعتذار، بل أرسل لها إنذار طاعة بعد أسبوع من مغادرتها، يُطالبها فيه بالعودة إلى «بيت الطاعة»، ويدّعي أنها ناشز لأنها تركت المنزل دون سبب مشروع،«أنا مش هربانة من مسؤولية، أنا هربانة من الإهانة، البيت مش بس أربع حيطان وتنضيف، البيت احترام ومودة، ولما ده يضيع، يبقى مالوش لزمة».

وبحسب ما روته، فإن الزوج يتعمد التحكم في كل تفاصيل حياتها، ولا يُقدّر مجهودها، ويعتبر أن دورها محصور فقط في التنظيف والطهي، دون اعتبار لمشاعرها أو حقوقها كزوجة.