محتاج دعواتكم.. بسمة بوسيل تعلن خروج آدم تامر حسني من المستشفى

أعلنت الفنانة بسمة بوسيل خروج نجلها أدم تامر حسني من المستشفى بعد تعرضه لوعكة صحية في الفترة المقبلة.

وقالت بسمة بوسيل في فيديو عبر حسابه بموقع التواصل الاجتماعي انستجرام": شكرا لكل الناس اللي سألت على آدم الفترة الأخيرة، هو خرج من المستشفى وأحسن بكتير، بس لسه في مرحلة العلاج محتاج دعواتكم.

حالة آدم تامر حسني الصحية

وكان قد كشف الفنان تامر حسني تفاصيل الحالة الصحية لنجله آدم بعد تعرضه لوعكة صحية شديدة الفترة المقبلة، وإجرائه عملية جراحية.

وكتب تامر حسني عبر حسابه  الشخصي فيسبوك: أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا و على تليفوني و تليفونات كل المحيطين بيا هو عمل عمليتين كبار بسبب انفجار الزايدة المفاجئ،  اللي كانت أعراضه سخونية عادية بس

وأضاف:  بقولكم كده عشان تبقوا حريصين مع نفسكم أكتر ولولادكم، و مش كل سخونية تقولوا ده شوية برد و خلاص لا روحوا اكشفوا كويس و اعملوا سونار على البطن و الزايدة مرة و٢ عشان برضو ساعات مش بيبان و لازم الدكتور يضغط بطريقة معيّنة، تقريباً أقوى شوية عشان يعرف.

وواصل: سمعت كتير اليومين دول إن الزايدة خادعة…اطمنوا كذا مرة قبل لحظة انفجارها عشان بجد مشاكل بتحصل بعدها كبيرة و محزنة أوي و حبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب و يعدي مرحلة الخطر يارب، بحق “كن فيكون”ة اشفيه وعافيه، هو و كل ولادنا .

وتابع: بس هو راجل و هيتحمل وإن شاء الله ربنا يكرمه و يعافيه و يحفظه هو و إخواته و يحفظ كل ولادكم يارب وأحب أقول تاني شكراً من كل قلبي على دعواتكم أنا شايف قلب كل حد فيكم و هو بيدعي بصدق متشكر أوي يا جماعة شكراً لكل اللي اهتم وسأل عن ابني و دعاله هنا أو على التليفونواللي طلعوله صدقات لشفائه من غير ما يعرفونا شخصياً أنا مش لاقي كلام أشكركم بيه و أنا برضو بدعيلكم  و بقول لكم مثلها وأضعاف أضعافها و ربنا يحفظكم ويحفظ أولادكم قادر يا كريم.