ريهام حجاج تتحدث لأول مرة عن زواجها بمحمد حلاوة :«مقدرش استغنى عنه وهو بيحنى جدا جدا»

تحدثت النجمة ريهام حجاج، عن زواجها من رجل الأعمال الشهير وعضو مجلس الشيوخ محمد حلاوة، وذلك بعد انفصاله بعام واحد عن زوجته الفنانة ياسمين عبد العزيز، مما أثار جدلًا واسعًا حينها خاصة أن ذلك الانفصال لم يكن معلنًا.

محمد حلاوة

وتابعت النجمة ريهام حجاج خلال حوارها مع الإعلامية بوسي شلبي على شاشة “النهار”: “يمكن الجدل بسبب زواجى من محمد حلاوة عشان محمد ارتبط بشخصيتين مشهورتين وأنا مقدرش استغنى عنه.. ومحمد شخص ناجح ومعروف ورجل أعمال مهم وقيمته كبيرة في المجتمع عشان كدا كان في اهتمام كبير بزواجه”.

وتابعت: “أنا وهو اتجوزنا بعد سنة من طلاقه، والطلاق ده مكنش معلن عشان كدا حصل قلق وبقينا مادة خام للقيل والقال .. وكل واحد حر حتى لو الطرف التاني ما أعلنش طلاقه ".

الحب والنصيب

وأضافت النجمة ريهام حجاج :" دي حياة شخصية ومش معنى أن اتنين اتطلقوا يبقى حد فيهم وحش أو كان في مشكلة ، ممكن يكون النصيب بينهم خلص أو الحب انتهى أو التفاهم مبقاش موجود" .

واستكملت: “ممكن جدًا الاتنين ينفصلوا لأسباب خاصة بينهم، الناس مش المفروض تحكم أو تتكلم في حاجات شخصية زي دي، إحنا بنعاني من ده عشان إحنا مشاهير”

السوشيال ميديا

وتابعت: “الجمهور المحترم مابيتدخلش في الحياة الخاصة للفنانين الناس اللي بتنتقد وبتكتب على السوشيال ميديا ده مش الجمهور، بقى عندنا اختلاط في الجمهور بين الرأى الطبيعى والتطفل وإن حد بيبدي برأيه في حاجة لا تعنيه "

الزواج مش عيب

وعن وجود صراعات ، قال النجمة ريهام حجاج :" الحقيقة مافيش أي حرب وكل الأطراف اتجوزت ومحدش شايف الحرب دي غير جمهور السوشيال ميديا، وأنا محبتش أطلع أرد وقت زواجى بمحمد حلاوة لأن الزواج مش عيب ولا حرام ولا غلط .. دا زواج على سنة الله ورسوله ".

تجاهل الانتقادات

وقالت الفنانة ريهام حجاج حديثها بأنها دائمًا تتجاهل الانتقادات التي توجه لها على مواقع التواصل الاجتماعي عن حياته الشخصية ، مشيرة إلى أنها تظهر فقط للتحدث عن نجاحاتها وأعمالها: “مبعرفش أطلع في برنامج مخصوص أقول تفاصيل حياتي الشخصية بتكلم عن أعمالي فقط”. ويعد الحوار التليفزيونى للنجمة ريهام حجاج هو الأول بعد غياب 6 سنوات عن البرامج التليفزيونية ، وتتحدث فيه حجاج عن تفاصيل جديدة من أعمالها الفنية ومشروعاتها الجديدة.