عمرو أديب عن تطوير منطقة وسط البلد:«أنا مش بتكلم عن بيع مصر ويا ريت نشجع الاستثمار صح» (فيديو)

علق الإعلامي عمرو أديب على مقترح رجل الأعمال الإماراتي، محمد على العبار، مؤسس شركة إعمار العقارية، والذي عرض أن يقوم بتطوير منطقة وسط البلد بالقاهرة.

وقال عمرو أديب خلال برنامجه «الحكاية» المذاع على قناة «إم بي سي مصر»: «نحن نحتاج كشعب مصري أن نكون أكثر انفتاحًا على ذلك، فالرجل أبدى رغبته في تطوير منطقة وسط البلد، وهو أحد أبرز الأسماء في مجال العقارات، ومع ذلك هي مجرد رغبة».

وتابع أديب: «لا بد أن نكون أكثر مرونة وسلاسة من ذلك. فنحن إما أن نكون دولة مغلقة على نفسها أو دولة منفتحة لاستقبال كافة الرؤى»، مشيرًا إلى أنه إذا اعتمدنا على الشركات المصرية فقط، فلن يفلح التطوير لسببين، قائلًا: «لو عايز تبقى دولة مغلقة على الشركات المصرية، فانت معندكش كل الفلوس دي، ومعندكش الشركات اللي تعمل ده».

وأضاف أديب: «منطقة وسط القاهرة اللي بناها أجانب، والعمارات دي لم يبنها مصريون. المسألة ببساطة، افتحوا الباب للجميع، افتحوا الباب لتصورات جديدة. منطقة وسط القاهرة دي مدينة لوحدها، وترميم هذه الأشياء مكلف جدًا، الوزارات القديمة زي وزارة التعليم من 1981 ووزارة الأوقاف اللي من سنين، لازم اللي يرممها يكون فنان. كلامي واضح، مش فاهم الحساسية اللي بقيت موجودة عند الناس. أنا بدعي، يارب تاخدها أي شركة سعودية، هولندية، أو إماراتية، أو غيرها».

ووجه رسالة إلى الدولة، قائلًا: «افتحوا الباب، أعلنوا أن مصر عندها مشروع عظيم. المتحف المصري ده من سنة 1902. الدولة المصرية عندها رؤية لأن يكون المكان سياحي».

وتابع: «عايز الشوارع دي في وسط البلد تتقفل، وما يبقاش فيها عربيات، ويبقى فيها ممشى، وزرع، وكافيهات، بدل النخل اللي من سنين ده».

وقال أديب: «أنا مش بتكلم عن بيع مصر، عشان محدش يقول عمرو عايز يبيع مصر، بس طالما ناويين نتطور، يبقى نعملها صح. شجعوا الاستثمار في مصر، ولو مش عايزين، عادي، ارجع أكلمكم في الأهلي والزمالك».