فرحة وسعادة في «مستشفى الناس» بزيارة الشحات مبروك.. وأسطورة كمال الأجسام: خدت منهم اطمئنان وطاقة

استقبل العاملون والمرضي والأطقم الطبية في مستشفى الناس الخيري لعلاج أمراض القلب والجهاز الهضمي والسكرى بالمجان، الشحات مبروك، بطل العالم وأسطورة كمال الأجسام في مصر والوطن العربي، بفرحة وتفاعل كبير خلال زيارته الإنسانية التي أجراها للمستشفى، في إطار سلسلة من الزيارات التي يقوم بها المشاهير ونجوم المجتمع إلى المستشفى لتقديم الدعم النفسي والمعنوي للمرضى والمشاركة في التوعية.

تضمنت زيارة الشحات مبروك، بطل العالم وأسطورة كمال الأجسام في مصر والوطن العربي، جولة تفقد خلالها غرف الأطفال المرضي، وتعرف على الخدمات الطبية المقدمة لهم، كما التقي عدد من الأطفال في العيادات الخارجية الذين حضروا مع أولياء أمورهم سواء للمتابعة بعد العملية أو للكشف ضمن الإجراءات الخاصة بتحديد ما يحتاجه كل طفل من إجراءات علاجية أو جراحية حسب كل حالة.

خلال جولته، تعرف الشحات مبروك، بطل العالم وأسطورة كمال الأجسام في مصر والوطن العربي، على جميع أقسام المستشفى بما في ذلك الصيدلية والمطبخ والمغسلة وغيرها من الأقسام التي تتعلق جميعها بتقديم أفضل خدمة ورعاية للأطفال أثناء رحلة علاجهم داخل المستشفى.

تفاعل الشحات مبروك، بطل العالم وأسطورة كمال الأجسام في مصر والوطن العربي، مع المرضي من الأطفال والكبار وأسرهم، والتقط الصور التذكارية معهم في حالة من الود والمحبة والبهجة التي سيطرت على الأجواء وظهرت على وجوه الجميع.

وقال الشحات مبروك، بطل العالم وأسطورة كمال الأجسام في مصر والوطن العربي، في كلمته خلال الزيارة: «أنا بفتتح كلامي بسعادة، أول مرة أسجل حاجة وأنا سعيد بكل فخر ببلدي جمهورية مصر العربية، أنا اسمي الشحات مبروك، وجاي عايز أخد فرصة إني أقدم حاجة على أدي يعني للناس اللي بتتعالج هنا بالجهود الذاتية من أهل الخير، فقولت خليني أبقي من أهل الخير، طلع إن أنا اللي جاي اتعالج».

وأضاف الشحات مبروك، بطل العالم وأسطورة كمال الأجسام في مصر والوطن العربي، «والله أنا من أول ما دخلت المستشفى وأنا عمال اتعالج نفسيًا، بكل مكان بتشوفه عيني، وكل كلمة بتسمعها وداني، وكل طفل كان مريض وخف، أنا شوفته وبيستقبلني وبدأ يعرفني بعد ما اتعالج بقدرة قادر، لقيته بيحاول يعرفني أو بيعرفني أنا شخصيًا بعد الرعاية الطبية الإنسانية الحقيقية اللي هو خدها، فأنا بقابله كويس، وهو بيقابلني كويس».

وتابع الشحات مبروك: «الناس هنا يتلقوا رعاية جيدة من كل القائمين على الخدمة في مستشفى الناس، أنا مش بعمل إعلان للمستشفى، لاء ده أنا بجبركم إن أنتم لازم تروحوا المستشفى دي وتشوفوها وتقدموا أي حاجة تقدروا عليها زي حالاتي كده، يعني أنا النهاردة مع الناس جاي أقدم خدمة، قولت أروح أشوف الأطفال الجمال اللي هما أحفادي يعني وأسلم عليهم، طلع إن أنا جيت أخد خدمة إنسانية من الناس اللي هنا».

واستطرد بطل العالم في كمال الأجسام: «ملائكة الرحمة اللي هنا الأطباء والإداريين وكل الناس اللي بتشتغل هنا القائمين على المستشفى، حريصين كل الحرص على متلقي الخدمة، مش بيقدموا حاجة عشان يتباهوا بيها، لاء دي حاجة حقيقية، والله أنا شوفت الناس هنا حقيقيين جدًا، مش عايزين يقدموا رعاية عشان أقول عليهم كويسين، لاء هما شايفين إن ده الصح، وده اللي المفروض يتعمل مع كل مكان طبي في جمهورية مصر العربية، وأنا أتمنى من كل قلبي إن كل مكان طبي في مصر يبقى زي هنا وزي اللي شوفته، أنا سعيد أوي، وفاتحتهم في حاجات كتير جدًا، وإنهم يتوسعوا في الخدمة ويوسعوا الأقسام، قالوا أه هنعمل».

وعن كيفية تقديم الخدمة للمرضي في مستشفى الناس، أوضح مبروك: «قالوا احنا بنستقبل متلقي الخدمة من المرضى بس بورق، قولتلهم طب لو حد زي حالاتي كده حصله حاجة أو لطفله أو حفيده ولا حاجة وحاول يخش؟.. قالولي يعني دا السياق، قولتلهم ليه متعملوش قسم كده، ويتصرف عليه من قسم استثماري، بس يبقى زي ده، لأن أنا مقابلتش في حياتي في جميع أنحاء العالم، مكان استثماري هادف للربح وفيه الخدمة دي، لكن الناس دي بتقدم خدمة ملائكية عشان هي غير هادفة للربح».

واستكمل أسطورة كمال الأجسام في مصر والوطن العربي: «هو أنا أطول إن كل الخدمات الطبية اللي في جمهورية مصر العربية بلدي، وإن الأماكن الطبية تبقى غير هادفة للربح وخيرية يعني، مش عشان من غير فلوس لاء، عشان تقدم خدمة حقيقية إنسانية من القلب للقلب.. كل سنة وأنتم طيبين وأهل الخير وأهل الثواب الناس الحلوة والكويسة اللي أنا أتمنى ابقى منهم يجوا هنا ويتفرجوا ويشوفوا يقدروا يقدموا إيه حتى لو كلمة حقيقية واللي شافوه يقولوا عليه».

وقال الشحات مبروك: «أنا مقدمتش حاجة، أنا جيت هنا خدت والله كل حاجة، خدت اطمئنان وطاقة إنسانية لنفسي ولأولادي ولأحفادي، أنا شوفت بعيني وسمعت من المرضى بوداني هما قالوا إيه، ودول أطفال يعني مش هيكدبوا، وأنا بحكي لكم دلوقتي لكن مصورناش حد وهو بيتكلم، لاء أنا سمعت منهم وشوفتهم وفرحت بيهم وهما فرحوا بيا، لأن هما مرتاحين بيلعبوا بألعاب أطفال وقاعدين بيعملوا كل حاجة».

واختتم الشحات مبروك، بطل العالم وأسطورة كمال الأجسام في مصر والوطن العربي، حديثه: «أنا مش محضر كلام ومش عارف أتكلم، ومش محضر كلام مزوق، لكن هنا أنا في سعادة، وبقولكم كل سنة وأنتم طيبين، وهل من مزيد.. وربنا يوسع عليكم عشان توسعوا علينا، واستقبلوا مرضى أكتر عشان منلاقيش طفل في جمهورية مصر العربية بيتألم وموجوع ويخف وجعه على أيديكم إن شاء الله».

الجدير بالذكر أن مستشفى الناس واحدة من أهم المستشفيات الخيرية الغير هادفه للربح، حيث تقدم خدماتها بالمجان لكل المصريين من الأسر المهمشة والأكثر احتياجا وغير القادرين، ونجحت المستشفى منذ افتتاحها عام 2019 في تقديم أكثر من 506 ألف خدمة طبية، والكشف على أكثر من 27 ألف مريض، كما أجرت المستشفى أكثر من 7 آلاف عملية جراحية بالقلب لحالات حرجة جدًا وعمليات قسطرة تشخيصية وعلاجية، إضافة إلى هذا تفتح مستشفى الناس أبوابها لكل مرضى القلب والجهاز الهضمي، وتعمل على وضع خطة علاجية لهم بأحدث الطرق الطبية ووفقاً لآخر المعايير والضوابط لهذه الأمراض عالمياً، حيث أجرت 630 عملية جراحية ومناظير جهاز هضمي خلال عام 2023.

ويشار إلى أن مستشفى الناس تبلغ مساحتها 30 ألف متر مربع تتضمن 7 أدوار، بطاقة استيعابية 600 سرير، و10 غرف للعمليات، و140 وحدة رعاية مركزة، و4 وحدات قسطرة قلبية، و48 عيادة خارجية، وقد تم افتتاح المستشفى عام 2019.

ويمكن التبرع لمستشفى الناس الخيري للأطفال من خلال الاتصال على الخط الساخن 16441، والانتظار لحين وصول مندوب المستشفى إلى المنزل، إضافة إلى التبرع من جميع البنوك المصرية على حساب رقم 16441 باسم مؤسسة الجود الخيرية – مستشفى الناس، أو عبر الموقع الالكتروني الرسمي للمستشفى https://alnas-hospital.com/donate-now أو من خلال إرسال رسالة تتضمن كلمة "طفل" على رقم 9797، أو منافذ فورى كود رقم 9145، إضافة إلى امكانية التبرع عن طريق شركات الدفع (instapay - أمان - مصاري - OPay- الأهلي ممكن).