مدحت صالح خلال احتفالية عيد الشرطة:"ضحوا وتعبوا عشان الشعب يعيش في أمان واستقرار"

أعرب الفنان مدحت صالح عن سعادته بالأمان والاستقرار، اللذين أصبحت مصر تمر بهما خلال الفترة الحالية، وذلك وسط الأزمات والتحديات التي تمر بها البلدان الأخرى، مؤكدًا شكره لرجال الشرطة المصرية، وذلك خلال وجوده في الاحتفال بالذكرى الـ 73 لعيد الشرطة.

مدحت صالح في احتفالية عيد الشرطة

وتحدث مدحت صالح على هامش الاحتفالية قائلًا: الشكر لرجال الداخلية قليل ليهم؛ لأن كلنا عارفين ومش محتاجين نعيد الحكايات تاني، قد إيه هما ضحوا وتعبوا عملوا كتير واستحملوا عشان الشعب يعيش في أمان واستقرار، مش عارف أشكرهم بأي شكل، وهدعي لهم ربنا يكرمكم وتفضلوا على العهد محافظين على مصر.

وأردف حديثه: بيقدموا للناس خدمات، وهما بيقوموا بالواجب على أكمل وجه، وكل الإجراءات لأي مواطن بيحب يخلص أي إجراء دلوقتي بقا سهل والدنيا كلها مميكنة، ومعمولة على أحدث الوسائل على مستوى العالم، كل ما هو متطور بقا موجود عندنا في مصر.

وأضاف خلال حديثه عن اللجان الالكترونية التي كان يمر بها الشعب منذ 7 سنوات قائلًا: من 7 سنين كنا بنعاني أن محدش بيرد ولا بيفكر يقول الحقيقة، على اعتبار أن الشعب المصري واعي وفاهم الحقيقة، لكن ده مش كفاية؟! لأن في ناس تفكيرها مفيش وعي وهيتأثروا ويأثروا بالسلب، وأخدنا قرار مش هنسيب حد يقول حاجة إلا لما نقول الحقيقة لأن ده بيفضح الكذابين والمنافقين، اللي بيعملوا إثارة وبلبلة، وده مجهود جبار لـ الشعب المصري، شعب طيب ومش المفروض نسيبه لأي حد بيقول أي كلام.

وأردف عن تأثير الفن: الفن طول عمره مهم ومؤثر جدا، ونتيجته فعَّالة وسريعة، ويمكن الفن أحيانا بيقصر المسافات أكتر من خطوات سياسية، ولما بيكون التوجه من خلال إننا مع بعض ونفس المركب، أنا بشوف إن الفن ضروري ومهم، مش ممكن مصر تكون من غير فن.