بعد أسبوع من حفل زفافها.. مى فاروق تطرح " سلطانة " من ألبومها الجديد

تعيش حاليا النجمة مى فاروق مع الأفراح، كأول عروس فى الوسط الغنائي مع بداية العام الجديد، وذلك بعد زواجها الخميس الماضى من الفنان محمد العمروسى، وايضا تعيش مى حالة من الانتعاش والتوهج الفني، حيث قررت طرح ألبومها الجديد خلال الفترة المقبلة وهو بعنوان " تاريخى" وطرحت الآن أغنيتها الثانية و تحمل اسم" سلطانة " علي اليوتيوب، وجميع المنصات الرقمية، ومحطات الراديو، وهى من كلمات عبد الرحمن محمد، وألحان مدين، وتوزيع موسيقى أحمد عبد السلام، وإخراج الفنان محمد العمروسى، فى أول تجربة اخراجية له مع الاغنيات، وتوزيع شركة ديجيتال ساوند.

الأغنية تحمل الطابع الرومانسى، وتعبر عن الحب والسعادة والاستقرار بين اثنين محبين ويقول مطلعها:" يا اكتر حد في الدنيا دى بتمناه .. يا حلم انا عشت طول الوقت بستناه.. وجودك جنبي يسعدني .. بقالى ضهر يسندنى .. اخيرا حب بطمن وأنا عايشاه .. خلاص مبقتش قلقانة معاك .. حاسة انى انسانة .. يا ونسى ودنيتي وناسي .. يا مملكتى وحراسى .. وأنا وياك بحس انى سلطانة ".

يذكر أن الفنانة مي فاروق كانت قد طرحت منذ أيام أغنيتها الأولى من ألبومها  الجديد وكانت بعنوان "باركوا " كلمات تامر حسين وألحان مدين وتوزيع موسيقى أحمد عبد السلام، وإخراج باسم دوما، وذلك بمناسبة زفافها الذى أقيم الخميس الماضى بأحد الفنادق الكبرى، وحققت الأغنية نجاحا كبيرا على السوشيال ميديا وتصدرت التريند على اليوتيوب.

كما حرصت الفنانة شهيرة على الدفاع عن الفنانة مي فاروق وزوجها محمد العمروسي، بعدما تعرضا لبعض التعليقات السلبية عقب حفل زفافهما، وذلك من خلال منشور عبر صفحتها الخاصة على موقع فيسبوك.

وقالت الفنانة شهيرة: «السلام عليكم ورحمة الله وبركاته بألقي السلام عليكم في الأول لأن نفسي يبقي فيه بينا سلام أيوه سلام نفسي بين الناس وبعضها وبين الناس المتنمرين والشتامين للفنانين بالأخص هو أنتم ايه مشكلتكم؟ تطاول عمال على بطال ودون سبب؟ والتدخل في حياتنا الشخصية دون وجه حق، نفسي من فترة طويلة أتكلم في الموضوع إلى أن وجدت الفرصة الذهبية اللي حمستني واستفزتني وهو فرح الجميلة مي فاروق ايه الجرم اللي عملته عشان عايزة تفرح هي وعريسها مالكم أنتم تعمل فرح ولا متعملش ولادها فرحانين ولا مش فرحانين مالكم أنتم أوصياء عليهم».

وتابعت شهيرة: «هو أنتم عايزين تلطشوا فينا عشان نفسيتكم تستريح طيب ما تروحوا لدكتور نفسي يريحكم وهيلاقي حل أكيد لكمية الحقد والغل والسواد اللي مالي قلوبكم طيب أنتوا بتقولوا إحنا مابنخافش من ربنا ماشي خافوا أنتم منه واتقوا الله في لسانكم هتعملوا إيه يوم الحساب ياللي بتعرفوا ربنا طيب الحديث اللي بيقول؛ هل يكب الناس في النار على وجوههم إلا حصائد ألسنتهم، ايه موقفكم من الكلام ده ياللي بتعرفوا ربنا هتتشدوا كده من لسانكم على النار بسبب تطاولكم وجرحكم لناس معملوش حاجة غير أنهم اتجوزوا على سنة الله ورسوله».

وأضافت: «وأعلنوا عن زواجهم طريقتهم مش عجبتكم انتوا ما لكم ما كل واحد حر في حياته يحتفل ويفرح براحته عيب والله تضايقوا ناس فرحانة وتقرفوهم كده الست يا عيني في مداخلة مستغربة من ردود أفعال المتنمرين والشتامين المهم الناس دي لو شافوا فنان في أي مكان يجروا وراه بالمشوار ممكن صورة ممكن سيلفي إيه التناقض العجيب ده، بدعي ربنا أن الناس دي تروح تتعالج مش كلام بجد والله لأن حسابكم بعد كده عسير وبتاخدوا برضه مننا دعوات حلوة».