«بلاش جو التلقيح ده».. إبراهيم عبدالجواد يهاجم إمام عاشور بعد اعتذاره

شن الإعلامي إبراهيم عبدالجواد، هجومًا ناريًا على إمام عاشور لاعب النادي الأهلي، بعد تصريحاته الأخيرة خلال اعتذاره على ما بدر منه في أزمته الأخيرة مع قائد الفريق محمد الشناوي.

كان إمام عاشور كتب عبر الاستوري الخاص به على إنستجرام: «أولًا كل الاحترام والتقدير لزمايلي ولكل منظومة الفريق من الكبير للصغير، وأنا بعتذر عن أي خطأ زعل حد مني، ومتقبل للعقوبة وده شيء طبيعي. لأن الفرق كبير أوي بين هنا وأي حتة تانية، للأسف فاكرين بالفبركة على السوشيال والتصريحات الكذب على لسان أخويا ممكن يأثروا على علاقتي بالأهلي وجمهوره.. ده مش هيحصل. أنا فخور بالأهلي وممتن جدًّا بدعم ومساندة جمهور الأهلي أعظم جمهور في الكون، وبإذن الله طموحاتي وأحلامي هتتحقق هنا في الأهلي».

وقال عبدالجواد خلال حديثه في برنامجه المذاع على شاشة قناة «أون تايم سبورت»: «الاعتذار من شيم الكبار والظاهر إن الاعتذار حاجة تثمن إن الواحد اعترف بخطئه وحاجة نحييه عليها، ولكن عندي 5 نقط حابب أقولها تعليقا على اعتذاره».

وأضاف: «العبرة بالملعب وليس باللقطات والتريندات الرخيصة، هتلعب وتجيب بطولات للنادي الأهلي الجمهور هيشيلك فوق دماغه وأظن إنك أكتر واحد شوفت الجمهور الحقيقي اللي يهمهم هو الملعب ومدى إسهامك في إحراز البطولات».

وأكمل: «جو التلقيح بتاع الحته التانية والتالتة، أحب أعيدلك وأزدلك إنك لو ملكش حق في الحته التانية مش هيبقى ليك خير في حد، لأن الحته التانية هي اللي خلت ليك اسم والناس تعرفك وتروح منتخب مصر وتحترف وخلت النادي الأهلي يشتريك وتبقى واحد من لعيبته».

وأردف: «افتكر الكلام اللي انت قولته على لسانك من احترام وتقدير الرمز الكبير والأسطورة محمود الخطيب النادي الأهلي اللي نصحك بيه وبيحترم الحته التانية إزاي».

وواصل: «المفروض والصح الواحد لما بيغلط بيقول آسف نقطة، ولكن آسف وأدعي المظلومية وأقول فبركة ومش فبركة، هو أنت لما عملت إعادة نشر لـ بوست واحد من المدربين اللي انت بتتمرن معاهم وبيتريق فيها على المدير الرياضي بتاعك وقعدت عندك 50 دقيقة وبعدين شيلتها، دي كانت فبركة؟ ولا لولا مطالبات اللاعبين الكبار زي عمرو السولية إنك تشيلها».

وزاد: «يا إمام انت متتشافش جنب اللاعبين الكبار اللي لعبوا في وسط منتخب مصر على مدار تاريخه زي أحمد حسن ومحمد شوقي، أو حسني عبدربه وغيرهم».

ووجه رسالة إلى إمام عاشور، قائلًا: «متفتكرش أن الخمس بطولات اللي حققتهم مع النادي الأهلي دول حاجة، ده لو لاعب ناشئ أو لسه معدي من جنب سور النادي خد أكتر منهم، رامي ربيعة في النادي واخد 6 بطولات دوري أبطال إفريقيا».

وأتم عبدالجواد تصريحاته قائلًا: «لو حد بيملى دماغك بكلام تافه وبيقولك إنك زين الدين زيدان ومين الناس دي عشان تعاملك كده سواء الشناوي أو محمد رمضان، حابب أقولك إنك هتروح زي لعيبه كتير راحت، إنت متجيش صباع في رجليهم الصغير في الكورة».