"عايزين يكسروا فرحتنا".. مؤلفة "الهوى سلطان" ترد على اتهامها بسـرقة فكرة الفيلم

قامت المؤلفة والمخرجة هبة يسري بالرد على اتهامتها بالسرقة فكرة فيلم “الهوي سلطان” الذي يعرض حاليا في دور العرض السينمائية، ونشرت هبة يسري عبر حسابها على الشخصي بموقع التواصل الاجتماعى الفيسبوك، صورا لنسخ سيناريو الفيلم التي كتبتها خلال السنوات الماضية قبل أن يخرج إلى النور، وأوضحت رحلتها معه.

وكتبت هبة يسري: "طب قسم بالله ورحمة أبويا في تربته أنا ما أعرف رشا الجزار دي ولا قريت أي ورق والفيلم ده فكرته عندي من تانية معهد سينما وفي نسخ منه مكتوبة من زمان جدا وعند ماريان خوري في المكتب ولو لسه الأفكار موجودة هتبقى في المعهد واتطورت على مدار سنين".

وتابعت: "وبجد ده ظلم بين ومحاولة لسرقة فرحتنا بالفيلم غير مسموح بيها تماما، ودول اللي باقي من الورق قبل ما أرمي كم الورق اللي كتبته على مدار سنين وعموما اللي شاف سابع جار و شاف الفيلم ممكن يقارن هاتوا خبير خطوط بقى ولا جهاز كشف الكدب".

اتهام رشا الجزار أبطال الهوي سلطان بسرقة فكرته

وكانت المؤلفة رشا الجزار اتهمت صناع فيلم "الهوى سلطان" بسرقة فكرة فيلم لها بعنوان "حُبي الأول"،وكتبت: "في سبتمبر عام 2017 قمت بكتابة معالجة فيلم روائي طويل بعنوان (حبي الأول)، ودا كان اسم مؤقت للفيلم

ومثبت عندي على الإيميلات والواتس آب بالتواريخ المراسلات للمخرجين والمنتجين في رحلة البحث عن إنتاج من حينها وحتى أشهر قريبة، وكان المورال بتاعي، أن الحب ممكن يكون قريب منك جدا وأنت مش شايفة ولا واخد بالك منه لانك مسمية أي اسم تاني (صداقة، عشرة، جيره، اخوه ... الخ)، مش شايفة مع أنه ممكن يبقي قريب منك جدا، ودا لأنك ملبسه امبريلا مختلفة في المسمى، يوم الخميس 7 نوفمبر الحالي، دخلت السينما عشان اشوف فيلم (الهوي سلطان)، ودا لأني بنتظر أي فيلم جديد ينزل السينما وبجري عشان أشوفه، وكنت متحمسه جدا لاني بحب منة شلبي وبشوف كل أعمالها".

وتابعت: "اتفاجئت أن قصة الفيلم كامله (باكد تاني كامله) مسروقة من قصة فيلمي (حبي الاول)، بكل التفاصيل.. مع اختلاف اللوكيشن والحوار عندي في قصتي كنت مسكنه البطل والبطلة في نفس العمارة في شقتين فوق بعض، بدون مبالغة لو ذكرت التفاصيل اللي عندي في قصتي واوجه التطابق بنها وبين اللي شوفته في فيلم الهوي سلطان، التطابق هيتجاوز ال 70%، الفكرة والقصة وكل الأحداث الرئيسية بتفاصيل ما سيحدث مع الأبطال مسروقين من قصتي (حبي الأول) حاولت على مدار يومين اتواصل مع مؤلفة ومخرجت فيلم (الهوي سلطان)، لكنها لم ترد على تليفوناتي، مع اني بعتلها رسالة على الواتس وعرفتها بنفسي وطلبت اني اكلمها ضروري، ورجعت بعدها اتصلت بيها تاني مرتين ولم ترد، البوست دا فقط من اجلي انا ومن أجل حقي في الدفاع عن شغلي، وليس من أجل أي شئ آخر".

أبطال فيلم “الهوي سلطان”

فيلم "الهوى سلطان" بطولة منة شلبي وأحمد داود وأحمد خالد صالح وجيهان الشماشرجي وسوسن بدر، ومجموعة من ضيوف الشرف خالد كمال، نورين أبو سعدة، عماد رشاد، فدوى عابد، ومن تأليف وإخراج هبة يسري، وإنتاج شركة "سي سينما برودكشن" هاني نجيب وأحمد فهمي.