شوبير يفجر مفاجأة بالقلعة البيضاء: سامسون كلف نادي الزمالك 100 مليون جنيه وهو لاعب درجة ثانية

كشف الإعلامي أحمد شوبير حارس مرمى الأهلي ومنتخب مصر السابق تطورات أزمة البنيني سامسون أكينيولا مع نادي الزمالك في ظل فشل الزمالك في إنهاء التعاقد مع اللاعب بصورة ودية حتى الآن وإصرار سامسون على الحصول على كامل القيمة المتبقية في عقده.

وقال أحمد شوبير في تصريحات إذاعية: «مصدر في نادي الزمالك كشف لي أن هناك محاولات جديدة للمرة الرابعة لإنهاء أزمة سامسون أكينيولا، هو سامسون بيقول أنا مبسوط كده ليه بقه الموسم ده عقبال عندك يعني له 615 الف دولار واللي جاي عقبال عندكوا كلكم له 692 ألف دولار».

 

أوضح شوبير: «يعني أكثر من مليون و300 ألف دولار، ده أيه ده، أيه اللي افترا ده، أيه الظلم ده، فيه كده يا جماعة هل ده معقول لاعيب مستواه لا يزيد عن مستوى لاعيب درجة ثانية في مصر خد في سنيتن قد كده ولسه له مليون و300 ألف دولار».

وتابع شوبير: «ولما تيجي تتكلم يقول لك اوعى تفتح بوقك ليه ما افتحش بقي، أنت عارف يعني أيه مليون و300 ألف دولار يعني حوالي 65 مليون جنيه وباللي خده قبل كده يبقى سامسون ده داخل لوحده في 100 مليون جنيه، فاد بقه الزمالك في إيه حرام والله».

وأضاف شوبير: «إنت جاي تقرن لي سامسون بالأسماء الكبيرة العظيمة اللي لعبت في نادي الزمالك زي بن شرقي وكوارشي وأمونيكي، ويرجع يقول لك إياك تتكلم، لأ لازم أتكلم عشان دي صفقات رائحتها تزكم الأنوف لازم الناس تتحرك والناس تحقق مش في موضوع أكينولا بس ولكن أي لاعب في أي ناد، إيه الأرقام اللي بتدفع دي».