عمرو مصطفي:"لو أم كلثوم موجودة كانت هتفتخر بيا"

تحدث الملحن والمطرب عمرو مصطفى عن الذكاء الاصطناعي ودخوله في عالم الغناء، وذلك خلال ندوة الموسيقى في عصر الذكاء الاصطناعي، على هامش مهرجان الموسيقى العربية بحضور كل من عمرو مصطفى، أحمد درويش، حسام لطفي، والمايسترو أمير عبدالمجيد.

وقال عمرو مصطفى في تصريحاته التي  الذكاء الاصطناعي مش هيكون بديل للبشر ولما عملت كدة كانت أكتر تجربة فاشلة وعملت التجربة قدام الناس وبقالنا ثلاث أو أربع سنوات، بنسمع مطربين بالذكاء الاصطناعي وإحنا منعرفش، واكتشفت إن الإبداع البشري لن يعوض.

وتابع: أنا عملت تجربة صوت أم كلثوم بالذكاء كان صوتي أنا في الأساس وكنت مجرد بثبت للناس إننا نقدر نقدم ألحان زي ألحان زمان، وبعد كدة على التيك توك شوفنا ناس بتعمل ألحان بصوت أم كلثوم مستحدثة ومشوفتش المنتجين بيتكلموا ولا بيعترضوا، لو كانت موجودة كانت هتسمع للمغنين الشباب زي ما سمعت لبليغ حمدي ومحمد فوزي، ولو كانت موجودة كانت هتفتخر بيا إن ليا أكتر من 150 عمل مترجم عالميا.

وسبق وأن وجه عمرو مصطفى رسالة لأشخاص مجهولة، من خلال منشور عبر حسابه الشخصي على موقع التواصل الاجتماعي فيسبوك.

وكتب: بقالهم 25 سنة وهمّا بيحطوني في مشاكل علشان يظهروني إني بتاع مشاكل، وكل ده عشان يخلوني زيهم، منافق وبيسمع الكلام!، بس بصراحة؟ لو رضخت في يوم، هتبقى اللحظة اللي أقول فيها باي باي لموهبتي الحقيقية، وكأنهم كسبوا المعركة. أنا بختار أسمعكم ألحان صادقة، وعندي طريقتي الخاصة اللي مش هتنازل عنها مهما كانت الحرب شغالة! يا جماعة، أنا صادق بروحي، وده اللي مضايقهم، لكن هفضل كده! خلّوني في حالي.. موهبتي مش للبيع!، الصدق هو سر موهبتي، ومش هتغير علشان حد.