«الحاجات دي متتقالش ومتعيش الناس في وهم رونالدينيو».. شوبير ينتقد نائب رئيس الزمالك

انتقد الإعلامي أحمد شوبير حارس مرمى الأهلي ومنتخب مصر السابق تصريحات المهندس هشام نصر نائب رئيس نادي الزمالك حول نجم الفريق أحمد سيد زيزو وشروطه لتجديد عقده مع القلعة البيضاء.

وقال أحمد شوبير في تصريحات إذاعية اليوم الخميس: «الحقيقة مكنتش أحب المهندس هشام نصر يكلم في فلوس زيزو وقال إنه طلب 60 مليون جنيه للتجديد مع الزمالك فالناس الحقيقة تسمع الرقم ده تضج وتغضب يا باشمهندس الأرقام في الحاجات دي مبتتقالش».

وأضاف شوبير: «وبعدين يقول لك هو رفض مبلغ كبير جدا من المملكة العربية السعودية فكثير جدا يا باشمهندس الرقم ده يتقال على أي لاعب في مصر مع كل احترامي لزيزو يعني، أنا شايف الكلام ده صعب شوية».

 شوبير ينتقد مسؤولي الزمالك بسبب صفقة راموس
 

كما وجه شوبير سهام النقد لمسؤولي الزمالك، عن التصريحات المتناقضة منهم حول صفقة المدافع الإسباني المخضرم سيرجيو راموس نجم فريق ريال مدريد السابق الذي ربطت بعض التقارير بينه وبين القلعة البيضاء في الأيام القليلة الماضية.

وقال أحمد شوبير : «سمعت شوية تصريحات هشام نصر نائب رئيس نادي الزمالك وأنا الحقيقة بتمنى يتم توحيد الخطاب بين المسؤولين هشام نصر وحسين لبيب وكل أعضاء المجلس».
 

وأوضح شوبير: «هاني شكري عضو مجلس إدارة نادي الزمالك قال راموس حاجة جميلة جدا وعظيمة لكن مش جاي الزمالك ومفيش فلوس، بعدها هشام نصر طلع قال: ابني بيقود المفاوضات بنجاح ساحق وهى بس السيولة المالية بس المبدأ راموس موافق والنجم الإسباني عايز ييجي جدا جدا».وتابع شوبير: «معلوماتي الشخصية إن راموس رفض اللعب في أمريكا، وأنا في الحاجات دي بالي طويل جدا جدا فباب القيد في مصر هيغلق يوم 25 أكتوبر فأنا هنتظر من النهارده 3 أكتوبر لغاية يوم 25 وهشوف إيه اللي هيحصل».
 

وأضاف شوبير: «متعيش الناس في وهم رونالدينيو بتاع زمان، كان يتقال هو جاي يا سادة يا فندم يقول لك اه اتصلنا وخلصنا وفيه حاجات صغيرة بس كده بنخلصها وهو مبسوط وعايز ييجي نادي الزمالك».
 

وأوضح شوبير: «وساعتها طلعت وقلت يا جماعة لو سمحتم نحترم عقول الناس فطلعوا هاجموني وقالوا لي أنت مستخسر رونالدينيو في الزمالك، لا والله العظيم يا جماعة مش مستخسره ونفسي ييجي ويلعب معاكم، بس فيه كلام بالعقل يعني فأنا هستنى ليوم 25 وهشوف القصة شكلها إيه هل نجل المهندس هشام نصر هيقدر يقنع راموس يلعب في الزمالك تبقى حاجة عظمة العظمة الحقيقة لو حصلت مش بتريق لأ بحق وحقيقي».