بعد سب أمه.. «اعتزال المذيع الداخلي لمباراة جورماهيا بسبب بعض الأفراد من جمهور الأهلي»

أعلن محمد صافي المذيع الداخلي لاستاد القاهرة في مباراة الأهلي وجورماهيا، عن اعتزاله جميع اشكال الاذاعة الداخلية لكرة القدم المصرية المحلية، وذلك بعد تأكيد سبه من بعض من جمهور الأهلي، خلال مباراة جورماهيا الكيني، والتي أقيمت في ستاد القاهرة الدولي،  وشهدت بعدها حفل تسليم درع الدوري للنادي الأهلي.

وأوضح صافي، في منشور له على صفحته الرسمية، على موقع “ x”: « أنا اسف يا أمي”.. الأسبوع اللي فات فى حفل تسليم درع الدوري، تم سبّي بالأم (الأهلاوية جدا جدا على فكرة) من قبل "بعض" الجماهير، و لم أعلم هذا إلا اليوم اللي بعده لما الفيديوهات اتبعتتلي، و لو كنت سمعت السباب فى ارض الملعب كنت سلمت المايك و مشيت إحتراما لأمي و لنفسي و لمهنتي.

وقال «متفهم أكيد ان الجمهور كان عاوز يهتف و يشجع، حقهم ١٠٠٪ و بالنسبالهم الصوت كان عالي و الأغاني كانت مدايقاهم فا شتموني أنا بالأم و أنا بسميهم « أعظم جمهور فى الكون». عمري ما ازعل من اطفال من دور اولادي انساقوا وراء هتاف، لكن مش عارف اتخطى منظر اللعيبة فى الملعب و هما بيضحكوا، منهم نفس اللعيبة اللي دافعت عن غريمهم لما اتشتم بحرقة كبيرة و لم يفكروا فى الدفاع عن راجل غلبان ابن ناديهم ضحى بالكثير ليكون هناك لاعلانهم "ابطال". لعيبة كنت اتشرف باعلان اساميهم فى محافل دولية كثيرة».

وأضاف: «مش قادر اوصفلكم صعوبة المكالمة و انا بكلم امي بعتذر لها أن شغلي جابلها الشتيمة القذرة بهذا الشكل. قالتلي "ربنا يسماحهم يا أبني و يديهم على قد نيتهم". اشكر كل من اعتذر لي على تيكتوك و منصات اخرى و اعتذارهم فوق راسي ليوم الدين، لكن مش عارف اتخطى اللعيبة اللي كانت بتضحك، مع ان سهل جدا انك كنت تشاور للجمهور "لأ". 

كان صعب جدا اني اتكلم فى الموضوع ده قبل ماتش السوبر تفاديا لأي لغط ممكن يحصل، لكن بعد ماتش امبارح قررت ازالة الثقل ده من على صدري. لذلك قررت اعتزال جميع اشكال الاذاعة الداخلية لكرة القدم المصرية المحلية. اكتفى باعلان تسليم النادي  اللي بعشقه منذ الطفولة واللي هفضل اشجعه لحد ما اموت، ٢ بطولة افريقيا منهم نهائي القرن و درع الدوري. و تحت امر الدولة فى اي محافل رياضية غير كرة القدم، لأني لن استطيع الاحتفال بأسماء من ضحك على سباب أمي، بالظبط زي ما عرفتش احتفل باسم لاعب متحرش فى بطولة افريقيا 2019. لن استطيع ان انافق نفسي.

و إيماناً بدوري المجتمعي، سأعكف على تمرين جيل جديد من المذيعين الداخليين لأكمال مسيرة بدأتها من 2019 هدفها الارتقاء بمهنة الاذاعة الداخلية فى مصر و وضعها فى المكانة اللي تستاهلها، و تاني تحت امر الدولة فى اي محفل رياضي غير كروي، و افتخر بكل الشغل اللي اشتغلته و شاكر جدا للفرصة اللي اتيحت لي.

بعتذر للجمهور اللي كان موجود فى الاستاد، حتى اللي سبوني بالام بدون وجه حق، او اي حد زعل من شغلي، حقيقي انا اسف ليكم. اتعلمت زمان انك لن ترضي الجميع، فا ارضي ضميرك فى شغلك و ده اقصى استطاعتك

حقيقي هارد لك لعيبة الأهلي على خسارة السوبر، هفضل اشجع الكيان لحد ما اموت مهماً كان 

تواضعوا يرحمكم الله

شكرا لجمهور مصر العظيم على كل الذكريات الجميلة، و اراكم فى محافل قادمة ان شاء الله

حقك عليا يا أمي.