بعد واقعة طفل بيارة مستشفى برديس.. رجل الأعمال محمد الدهشوري يوجه رسالة للمسئولين: أنقذوا الصعيد

حرص رجل الأعمال محمد الدهشوري، اليوم الأربعاء على توجيه للنائب العام ووزير الصحة خالد عبدالغفار ومحافظ سوهاج وللسيد القائم بأعمال الصرف الصحي بالمحافظة وللسادة القائمين على تنفيذ مشروعات الدولة، بسبب واقعة مأساوية لطفل البلاعة في محافظة سوهاج. 

وقال رجل الأعمال في فيديو منشور له على صفحته الشخصية على موقع التواصل الاجتماعي "فيسبوك":"في البداية يا سيلدة المحافظ.. كان عندك من أقل من شهر 3 أطفال ماتوا في حضانة بسبب اختناق من حريق مطعم".

وأضاف:" أنا مش عايز أتكلم في الموضوع دا لإنه عدى خلاص، ولكن النهاردة هتكلم في موضوع بسيط خالص هي الناس بتروح المستشفى ليه سيادة المحافظ يا سيادة الوزير وسيادة الرئيس وسيادة النائب العام".

وتابع:" كل الناس بتروح المستشفى علشان تعبانة وتكشف والمستشفيات دلوقتي عندنا في الصعيد محدش بيروحها إلا في حالة الطوارئ يعني الحالة جابت آخرها لحد ما أشوف بديل".

واستكمل:" وبعد كل الصرف دا والإشراف الشديد جدًا من القائمين على المشروعات، تبقى في مستشفى حديثة جديدة، تدخل مواطنة فيها علشان تعمل عملية الزايدة فتحولها لمستشفى تانية فتقد ابنها اللي عنده 5 سنين وقع في بلاعة مجاري فتحتها 120 سم، هو مفيش حد من الناس المسئولة عن استلام المستشفى جات عينه على البلاعة اللي خطيره على الكبير والصغير، وكل اللي بيدخل المستشفى مش بيكون في وعيه، وأي حد ممكن يكون مكان الطفل اللي مات".

وأشار إلى أن:" الطفل اللي اتوفى دا سيادة المحافظ عنده 5 سنين ، يعني فين احترام الروح يا جماعة، ومحتاجين فتح تحقيق عاجل في الموضوع دا، ولازم صفحة الوزارة والمحافظة ترد بشكل تشخصي كامل، والموضوع مش سهل لإنه بيتكرر كل يوم، والصعيد بيستغيث يا جماعة الخير، أنقذونا لإنه في ظلم واضح".

وأختتم:" أنا مش من طبعي أطلع أتكلم في الحاجات ولا بحب أتكلم عن السلبيات، لما توصل للروح مرة واثنين يبقى حرام ومحتاجين ردود، وياريت سيادة المحافظ يروح لأهل المتوفي وبرر ليهم اللي بيحصل، وكل اللي هيشوف الفيديو في كارثة في سوهاج، طفل وقع في بلاعة مستشفى لو في الشارع الوضع كان هيبقى غير مقبول لكن كنا هنقول في إصلاحات، لكن الموضوع في المستشفى والناس داخلة تعبانة، اغيثوا الصعيد كله واهتموا بحق طفل قرية الغنايمية مركز البلينا بمحافظة سوهاج، ورجاء المتابعة والأهمية والرد بالضرورة القصوى.  

وقال والد الضحية في لايف خاص لموقع بصراحة: «يوسف ضحية الإهمال دخل مستشفى برديس يكشف مع أمه طلع منها ميت.. ومحاولات الوصول للطفل استمرت ساعتين حتى استطاع أحد أقاربه إحضار سلم والنزول له وانتشال جثمانه"

وتابع: «أتمنيت لو أنزل من سفري دلوقتي أنزل أجيبه ساعتين ومحدش عارف ينزل حتى إنهم اتصلوا بسيارة كسح للصرف الصحي وتأخرت، نزل ابن عمي لقاه طفى على الوش مسكه من ضهره ورفعه وطلع بيه»

وأضاف والد الطفل: «الصرف كان مغطى لحد رقبة الشخص اللي انتشل الجثة من الضهر، يعني ابني استكفى وطفا، وبعد انتشاله طلبوا منهم في المستشفى أخذ الطفل ويرجعوا بيه على البيت وبالفعل حصل، لكني رجعتلهم تاني المستشفى عشان حقه مايضيعش».

واختتم والد الطفل حديثه قائلا: «أنا بطالب بحق ابني.. ابني اللي ربيته 5 سنين وراح في ثانية بسبب الإهمال.. ضنايا راح في لحظة ومقدرتش أنقذه.. بطالب بحقه يرجع ومش عاوز تعويض أو غيره».